Өлкөдө Кыргыз эл акыны Байдылда Сарногоевдин 90 жылдыгына арналган эл аралык айтыш өтөт. Бул тууралуу уюштуруучулар билдирди.

Иш-чараны Маданият, маалымат спорт жана жаштар саясаты министрлиги, президенттин Талас облусундагы ыйгарым укуктуу өкүлчүлүгү, Кыргыз улуттук "Манас" театры жана республикалык "Айтыш" коомдук фонду биргелешип уюштурмакчы.

"Айтыштын тандоо туру 10-май күнү саат 10:00дө "Манас" кинотеатрынын залында өтөт. Анда 12 акын тандалат. Айтыштын финалдык бөлүгү 15-16-майда Талас шаарындагы Капар Медетбеков атындагы драма театрында болот", — деп айтылат маалыматта.

Кыргыз эл акыны Байдылда Сарногоев поэзия майданына кошулган өткөн кылымдын 50-жылдарынан тартып эле окурмандардын калың катмарынын сүйүктүү акынына айланган. Анын "Ак калпак", "Ашуудан берген отчётум" деген китептери колдон-колго өтүп окулган. Сарногоевдин ырларынын ар бир сабынан кыргыздык мүнөз, кыргыздык бөтөнчөлүктөр көрүнүп турат. Ал төкмөлөр чыгармачылыгына жакын, нукура улуттук колорит менен жазган.

Булак: NazarNews.kg