Барабар үңкүрлөрүнүн сыры

Журналист: АЙСУЛУУ ТАЛАНТ

11.03.2026, 15:27

2646

дүйнө жүзүндө

Индиянын Бихар штатындагы Барабар тоолорунда жайгашкан байыркы үңкүрлөр дүйнөдөгү эң эски таш үңкүрлөрдүн бири болуп эсептелет. Тарыхчылардын маалыматына караганда, бул курулуштардын жашы эки миң жылдан ашат.

Изилдөөчүлөрдү өзгөчө таң калтырган нерсе үңкүрлөрдүн ичиндеги дубалдардын өтө жылмакай жана тегиз болушу. Айрым жерлерде таш беттери күзгүдөй жаркырап, жарыкты чагылдырат.

Барабар үңкүрлөрү байыркы Маурья империясы дооруна (б.з.ч. 322–185-жж.) таандык. Айрым үңкүрлөрдө ошол мезгилдеги атактуу башкаруучу Ашоканин буйругу менен жазылган таш жазуулар табылган.

Тарыхчылардын айтымында, бул жайлар көбүнчө аскет-монахтар медитация жана диний жөрөлгөлөр үчүн пайдаланган жай болгон.

Комплекстеги эң белгилүү жай – Ломас Риши үңкүрү. Анын кире бериши кооз оюулар менен жасалып, жыгач архитектурасын элестеткен арка түрүндө чегилген.

Илимпоздор мындай тактыкка кантип жетишкенин азыркыга чейин толук түшүндүрө алышкан жок.

Барабар үңкүрлөрү азыр Индиядагы белгилүү туристтик жайлардын бири. Жыл сайын миңдеген туристтер бул жерге келип, эки миң жыл мурдагы инженердик чеберчиликти өз көзү менен көрүшөт.