Калайык-калктын бары тең Бишкек депутаттарындай бардар көпөстөрдүн жек-жааты эмес. Азыр Европадагы кээ бир кыргыз жигиттери өздөрүнүн акча каражаттарына ыңгайлуу автобустарды сатып алып, жол кирени 8 сомдон эле кылып, Бишкекке жардам көрсөткүсү келип турат. Арифметикалык эсепке салышса 8 сомдон ар кандай чыгымдарды жаап, андан да ашып калат экен. Бирок, бул үчүн мамлекеттин кепилдиги керек. Баа көтөрүлгөнү Камчыбек Жолдошбаев сыяктуу депутаттарга кепек эмес. Ал депутаттар арзан автобуска түшсө уялып кетет. Бишкекке кайталап шайлоо өткөзүп жатып, араң депутат болушкан. Мурунку депутаттары Усубалиевдин небереси, Пирматовдун эжеси, Салымбеков жана башка дөө-шаалардын жек-жааттары депутат болуп келишкен. Мэрия эмне дешсе кол көтөрүп беришчү. Добуш бергени аз келгенсип опера театрын ижарага алышып, той-тамаша өткөрүп турчу. «Алма сабагынан алыс түшпөйт» эми деле Салымбеков жана башка дөө-шаалар келери күтүлүүдө. Ал депутаттар биринчи жыйында эле жол кирени көтөрүп беришет. «Светтин» баасын көтөрөбүз деп турганда президент токтотуп койду. Бишкекке жол кирени көтөрсө эле өлкө боюнча жол кире көтөрүлөт. Айлык акы көтөрүлбөсө карапайым элге катуу сокку урулат. Парламенттик шайлоо алдында мындай «удардын» кереги барбы? Балким, президент жол кирени көтөрүүнү токтото турар.

Бишкек мэриясы шаардык кеңештен биринчи эле жыйынында коомдук транспорттогу жол кирени көтөрүү маселесин карап берүүнү өтүнө баштады. Бул тууралуу ЖКнын бюджет жанан финансы комитетинин жыйынында Бишкектин вице-мэри Максат Сазыкулов билдирди. Анын айтымында, Бишкек мэриясынын балансында 476 автобус болсо, анын 140ы гана иштейт. 183 троллейбустун 110у гана линияга чыгат. Ал эми 3000 маршрутка каттоодон өткөн болсо, 900-1 300ү эл ташыйт. Июндун башында Бишкектин маршрутка айдоочулары жол кире акысын көтөрүүнү талап кылып иш таштаган.“Тарифтерди көтөрүү боюнча сунушту шаардык кеңештин депутаттарына бердик. Маршруткадагы жол акыны – 15, автобус менен троллейбустардыкын 11 сомго жогорулатуу сунушталууда. Учурда биз шаардык кеңештин биринчи жыйынын күтүп жатабыз. Маселени алгачкы эле жыйында карап берүүнү өтүнгөнбүз”, – деди Сазыкулов.

Жакында Бишкек шаарына 50 автобус келген. Жаңы келген автобустар шаарыбыздын экологиясына мурдагыдан да терс таасирин тийгизип жатат дегендер да чыкты. Буга чейин Бишкек мэриясы «Эко Пассажирские перевозки» ЖЧКсы менен газ менен жүрүүчү эко - автобустарды алып келүү боюнча келишимге кол коюшкан. Азыркы автобустар Өзбекстандан келип жатат. Газ менен эмес дизель автобустар. Бул шаарыбызды экологиясына мурдагыдан да терс таасирин тийгизет. Газдаштырабыз деген Бишкек ТЭЦ ишке ашпай турган болду, газ менен жүрөт деген автобустар дизель болсо, быйылкы кышта Бишкеке жашап деле кереги жок болот окшойт.

Автобустардын келиши да Түлеевдик «коррупциялык» жолдорду баспагай эле. Билишимче газ автобустардын баасы 39 миң $ экен, а бул дизель автобустардын баасы 32 миң $ турат экен. Айтор, бааларда дагы айырма секирип жатат. «Мамлекеттен бир тыйын кеткен жок» - деп жатат. Анда бир жылда келип бүтө турган 350 автобус кандай негизде келди? Чын эле бепбекерби? Жок, болушу мүмкүн эмес. Алгандын бермейи бар да. Кредитке болсо керек. Бул кредитти жабыш үчүн ар бир автобус күнүнө 7-7.5 миң сом иштеп табышы керек.

Автобустардын Өзбекстандан келип жатканын эске алсак, анда Азияны «Кия», «Тойота» борборлору менен кармап турган өзбек эки ишкер жигиттин кулагы тикчийе тургандай. Булар жөн эле баш салчулар эмес эле. Кызыгы кыргыз тараптан аталган «Эко Пассажирские перевозки» ЖЧКсын, Кыргызстандын кен байлыктарына кенен колу-бутун салып, Бишкек шаарынан эле 28 батирди дос-тууганына жаздырып ээлеп турган, ал үчүн сурак берип, бирок суудан кургак чыккан, бир кездеги Тоо кен агенттигинин башчысы абактагы Дүйшөнбек Зилалиевдин орун басары Азиз Сапаралиевдин башкарып жатышы эле, бир топ сөздү чыгара тургандай.

Эмнеси болсо да, булганган шаарыбыздын тазалыгы үчүн деп, башында газ автобустар келет деп келишим түзүп, анан минтип дизель автобустардын келип жатышында чоң «сырлар» бар.УКМК укуругун ушундай күмөн санаткан иштердин башталганында ыргытпай, баары чырмалып, жеп, алып, туйтунуп бүтүп качып, автобустар талкаланып калганда иш козгоп, коррупциясы болсо камап калышат.

Жол киренин шайлоо болгон соң көтөрүлүшү ичиркентип турганда акысыз каттаган жаңы автобустар келе баштады. Эми ансыз деле айлыгы аз элдин чөнтөгүнө кол салбай ишташтоону баштаган бузуку шопурлардан арылыш керек. Түштүк Кореянын Isuzu үлгүсүндөгү автобустар Токмок шаарында курулуп калмак. Ошол мезгилдеги кыргыз «истэблишменти» кекиртегин чертишұип, «шапкесине» мыйзамсыз акча сурап жатышып, Өзбекстанды көздөй өтүп кеткен. Өзбекстанда өндүрүлгөн ISUZU үлгүсүндөгү автобустардын узундугу 6,9 метрге жетет.2021-жылдын 22-июнунда Бишкекте жаңы 50 автобус каттай баштады. Албетте, жаңы автобуска эмнелерди каалайбыз, ылайым жол киренин баасы көтөрүлбөй, айлыгы аз, көңүлдөрү пас жүргүнчүлөрдү маанайы көтөрүлсө экен, Балбак Түлөбаев пландагандай жол киреси көтөрүлбөсө экен.

Бул автобустар дизель майы менен жүргөндүктөн кыска убакыт ичинде алып келинди. Газ менен жүргөн автобустар шаарга эми келет. Бардыгы 350 автобус алып келүү пландалып жатат. Бул автобустар төмөнкү маршруттар менен каттап жатат:

№10 жана №11 муршруттар — Ак-Ордо (айлампа);

№12 маршрут, Маевка айылы — Көк-Жар айылы (айлампа);

№13 маршрут, Муромская көчөсү — Кырман жаңы конушу;

№14 маршрут, №12 кичи район — Ак-Ордо жаңы кошуну.

Автобустарды алып келип иштетип жаткан "Эко-пассажирские перевозки" аттуу жеткирүүчү компаниянын маалыматына караганда, жаңы транспорт бир апта бою белек катары шаардыктарды акысыз ташыйт. Бул да жакшы жөрөлгө, бир жума болсо да эл-журтуна жеңилдик каалап турган бул компанияга рахмат!

Бишкек шаардык мэриясы Isuzu үлгүсүндөгү газ менен жүргөн 350 автобусун алып келип иштетүү үчүн "Эко-пассажирские перевозки" аттуу жеткирүүчү компания менен кызматташуу боюнча меморандумга кол койгон.

Жол кирени көтөргөндөн мурун, бири-бирин кайталаган маршруттардын санын кыскартыш керек. Бийлик айдоочуларга убактылуу азуусун көрсөтүп койду. Акыркы мезгилде «Кумтөр» маселеси чиедей чырмалышып, улам бир алкы-бузуктун жүзү ачылып жатканда, туурадан айдоочуларга бүлүк салышып, жол кирени 15-20 сомго көтөрүшүп, элдин капчыгына кол салгысы келгендер чыгышкан. Бишкекте коомдук транспортко болгон тарифтер сентябрга чейин эле көтөрүлүшү мүмкүн. Бул тууралуу Жогорку Кеңештин жыйынында мэрдин милдетин аткаруучу Бактыбек Кудайбергенов билдирген: «Биз маршрутка айдоочуларын сентябрга чейин күткүлө деп жатабыз. 11-июлдагы шайлоодон кийин жаңы шаардык кеңеш келгенде, балким, маселе эрте чечилип калар. Айдоочулар так убакытты айткыла деп жарга такап жатат. Азыр кырдаал оор, биз алардан көз каранды болуп турабыз», — деген Кудайбергенов. Учурда мэрге канат бүтүп Жамалбек Ырсалиев деген жаш канаттуу болду. Мэриянын оюу боюнча Бишкек шаарында борбор калаанын символу боло турган «Ала-Тоо Тауэр» комплексин куруу пландалууда. Анын айтымында, комплексте соода түйүндөрү, мейманканалар болот. Инвесторлор Бишкек шаарына келишти.

Калаа башчысынын милдетин аткаруучу тарифти Бишкек шаардык кеңеш чечерин, алар азыр үгүт иштери менен жүргөндүктөн чогулта албай жатканын айткан. Бул шайлоо учурунда гана элдин көңүлүн ала турган акция эмеспи? Эл бир жумалык кыйынчылыкты чыдап көтөрүштү. Араң турушкан таксисттер мындай элдин башына кыйынчылык түшүп жатканда акчага маарышып, жол кирени өздөрү каалашкандай көтөрүп жиберишти. Былтыр да коронавирус учурунда мындай алааматты көргөн эл тоготкон да жок.

Жол кирени көтөрүүдөн мурун бири-бирин кайталаган маршруттардын санын кыскартыш керек. Бишкекте бопбош эле каңгып жүргөн кичи автобустар канча? Жол кирени көтөрүп койгондо элге кыйынчылык түшөт, ал эми алардын кичи автобусу бары бир толбойт. Ошондуктан, кереги жок маршруттардын лицензияларын алып, Бишкек ичиндеги маршруттук таксилерди кыскартыш керек. Бул маршруттук таксилер жүргүнчүлөрдү жула качып, автобустарга тоскоолдук кылышат.

Ал эми айыл тараптан келген (пригородный) маршруттук таксилердин жол киреси жетишерлик эле. Алар жык-жыйма болуп, бири-бирин тебелесе да резинадай сала беришет. Бир рейстен эле 500-600 сомго чейин табышса, бир рейсин бензинге кетиришсе, канча пайда таап жатышат.Бишкекте жол кире көтөрүлсө алар каалашынча жол кирени көтөрүшмөк. Эмне алар байыш үчүн жүргүнчүлөрдүн жол киресин көтөрүү керекпи?

Бишкекке 350 жаңы автобус келе жатат деген кеп угулуп калганда эле, мурунку мэрлердин ой-пикирлери боюнча жаңы сатып алынган автобустарды накта акчага эмес, келечекке карыз алгандыктан жол акысын көтөрүшүбүз керек экен. Алардын оюу боюнча автобусту сатып алган акча каражаты али чечиле элек эле. Өзбекстандагы автобусту чыгарган заводдор менен келишим түзсөк, ал заводдор бизге 3-5 жылга чейин автобустарды насыяга берет имиш. Ошондо азыркыдай 100 гана автобус эмес, эки жылга кенен эле, 500 автобус сатып алсак боло тургандай экен. Эгер жолдо жүрүү тарифин 15-20 сомго көтөрсөк шаардыктар ыңгайлуу, жаңы автобустарды сатып алса болот деген. Ушундай жол менен жол жүрүү тарифин көтөрүп гана каржылоо маселесин Бишкек мэриясы чечип алат экен. Алар да Бишкек мэриясынын каймагын калпып “ооз тийип” калган эле, бирок “ай күнүнө жетпей” ал кызматынан кеткен. “Таппасаң сыйпалап кал” мэр автобустар менен жылаңайлак жүрүшүп эл менен кошо кыйынчылык тартыш керек. Мэрлер кымбат баалуу унаага отурушкандан бери, элдин жол жүрүү акысы көтөрүлөбү баштары деле оорушпайт да.

«Борбордун статусу жөнүндө» Кыргыз Республикасынын мыйзамынын 24-беренесиниин 4-бөлүгүнө ылайык, Кыргыз Республикасынын Бишкек шаарынын жаңы мэри шайланганга чейин Кудайбергенов Бактыбек Кыргыз Республикасынын Бишкек шаарынын мэринин милдетин аткаруучу болуп дайындалган. Жол кирени көтөрүү Кудайбергенов Бактыбектин мойнуна жүктөлө тургандай болуп турган. Бул жолу буйтап кетти.

Күнүгө жок дегенде арты 1000 сом таап, алды 2-3 миң сом таап жаткан айдоочулар элди ойлобой өз жандарын ойлошуп жол кирени көтөрүү талабы менен чыгышууда. Шопур Илмиянов мамлекеттик рулду башкарып жаткан Атамбаевдин заманында айдоочулардын айткандары «лып» аткарылып жол кире улам-улам көтөрүлүп турчу. Бишкек мэри Иса Өмүркулов жан дили менен көтөрүп турчу, 2012-жылдын 1-майында бааны көтөргөн. Ал эми Сооронбай Жээнбеков президент болгон соң айдоочулар дагы жол кирени көтөрүү маселеси менен чыккан, иштесең ушул жол кире менен иште, иштебесең башкалар иштей берет деген принцип менен жол кире көтөрүлгөн эмес. Азыркы бийлик да ушул позицияны тутунуп жалпы элге жакшы кылды. Эгер Бишкекке шайлоо өткөнүнө аз гана болуп, али официалдуу шайлана элек мэр айдоочулар үчүн элге каршы жол кирени көтөрүп, элдин кыжырына тийип, кайрадан башалмандыкка жол ачышы мүмкүн эле. Айлыгы аз эл үчүн жол кирени бир-эки сомго көбөйтүү да оор тийет. Анткени, кээ бир үйдө канча адам жумушка барып келсе, канча бала мектепке барып келип жатат. Андай болсо айлыкты да көтөрүш керек.

Эгерде маршруттук автобустун айдоочулары кайрадан иш таштаса, анда мэрия Транспорт министрлигине эл ташуучулардын лицензиясын жокко чыгаруу өтүнүчү менен кайрылыш керек. Бишкек мэриясы айдоочулар талап кылган жол акыны көтөрүү маселесин кароого даяр эмес. Бул тууралуу транспорттук компаниялардын жетекчилерине эскертүүлөр берип, эми ушундай иш таштоо болсо, маршруттук таксилердин айдоочулары ишин токтото турган болсо, анда аларга мыйзам чегинде чаралар көрүлүш керек.

Элди ташууга лицензияны Транспорт министрлиги берет, мэрия болсо аны жокко чыгаруу үчүн кайрылыш керек. Бир апта маршруттук таксилердин айдоочулары ишти токтотуп жол кирени 15 сомго чейин көтөрүүнү талап кылышкан. Мэрияда кичи автобустарда жүрүү тарифтерин жогорулатуу маселесин кароо боюнча жумушчу топ түзүлгөн. Бир жуманын ичинде айдоочулар болжолдуу сметаны шаардык транспорт бөлүмүнөн карашып азырынча мурунку баа менен калышты. Күнүгө миңдеген сом киреше таап жаткан шопурлар элди дагы сыгып жол кирени көбөйтүүнү талап кылууда. Айдоочулар ишин таштап жатышат, ал эч нерсе эмес, жалпы эл чыга турган болсо бийликти шыпырып түшкөнүн көрүп жүрөбүз. Ошондуктан айдоочуларга түшүндүрүү иштерин жүргүзүп, эл кыйналып турат, элдин айлыгын көтөрөлү анан жол кирени көтөрөлү деген маселеге келиш керек эле. Кызмат машинасы менен жүргөн мэрдин жол кирени көтөргөнү жакшылыкка алып келбесин түшүнгөн Бактыбек Кудайбергеновдун бул позициясы элге жаккан. Бирок, күз келатат…

Азизбек КЕЛДИБЕКОВ, NazarNews.kg