Энергетика министрлигинин демилгеси менен энергетика тармагындагы реформанын жана санариптештирүүнүн алкагында Бишкек электр тармактар ишканасы — «КУЭТ» ААКнын филиалы тарабынан АСКУЭ — электр энергиясын коммерциялык эсепке алуунун автоматташтырылган тутумунун эсептегичтери орнотулууда.

АСКУЭ эсептегичтерин орнотуунун негизги максаты — электр энергиясын бөлүштүрүүнү натыйжалуу жүргүзүү, көзөмөлдү күчөтүү жана керектөөнү так эсепке алуу.

2025-жылдын башынан бери Бишкек шаарынын райондорунда жалпысынан 28 000 акылдуу эсептегич орнотулду. Анын ичинде:

• Ленин району — 9 140 даана

• Свердлов району — 4 659 даана

• Биринчи Май району — 11 742 даана

• Октябрь району — 2 374 даана

Мындан тышкары, 2026-жылы 42 000 акылдуу эсептегич орнотуу пландалууда.

Акылдуу эсептегичтердин артыкчылыктары:

• көрсөткүчтөрдү серверге реалдуу убакыт режиминде автоматтык түрдө өткөрүп берет;

• керектөө белгиленген кубаттуулуктан ашкан учурда электр энергиясын автоматтык түрдө өчүрөт;

• дебитордук карыз болгон учурда электр энергиясын автоматтык түрдө өчүрүп, төлөм жүргүзүлгөндөн кийин кайра күйгүзөт;

• эсептегичке тыштан кийлигишүү аракети аныкталганда дароо кабар берет;

• жеткирилген электр энергиясынын сапатын жогорулатат;

• электр энергиясын уурдоонун коркунучтарын азайтып, контролёр менен керектөөчүнүн түз байланышына болгон муктаждыкты кыскартуу аркылуу адам факторун жокко чыгарат;

• электр жабдууларын ашыкча жүктөөдөн коргойт.