24-апрелде Киевге барган АКШнын мамлекеттик катчысы Энтони Блинкен менен коргоо министри Ллойд Остин Украинанын президенти Владимир Зеленский менен жолукту.

Бул маалыматты дүйшөмбү күнү эртең менен Зеленский да, Украинадан Польшага барган АКШнын өкүлдөрү да ырасташты.

Варшавада сүйлөгөн Блинкен Украина Орусияга каршы согушта «ийгиликтерге жетишип жатканын» белгилеп, сапардын негизги максаты – АКШнын Украинага жана украин элине болгон колдоосунун жогорку деңгээлин көрсөтүү болгонун айтты.

Сапардын жыйынтыгында Украинага аскердик көмөк көрсөтүүнүн алкагында АКШ 300 миллион долларлык жаңы жардамдын топтомун бере турганы жарыяланды. Мындан тышкары сүйлөшүүнүн жүрүшүндө АКШ элчилигин Киевден Львов шаарына көчүрүү маселеси да талкууланды.

Орусия Украинага басып киргенине эки ай болду. Москва менен сүйлөшүүлөрдө украин делегациясын жетектеген, украин президентинин кеңешчиси Михаил Подоляк жекшемби күнү билдиргендей, орус күчтөрү Мариуполь шаарындагы украин күчтөрүнүн акыркы чордонуна айланган «Азовсталь» заводун аткылоону улантып жатат. Подоляк Москваны Пасха майрамына байланыштуу ок атышууну токтотууга чакырды.

Буга чейин орус президенти Владимир Путин «Азовсталь» заводуна чабуул коюуну токтотууну, бирок өндүрүштүк жайдын айлана-тегерегин «чымын учуп өтпөгүдөй кылып бөгөттөөнү» буюрган.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg