Бразилиянын Рио-де-Жанейро шаарында шаардын тарыхындагы эң ири операция учурунда полиция менен "Кызыл команда" деп аталган кылмыштуу топтун ортосунда кагылышуу чыгып, 64 адам каза болду. Бул тууралуу "La Nacion" басылмасы билдирди.

Операция кечээ, 28-октябрда эртең менен шаардын түндүгүндөгү Пенья жана Алемао райондорунда өттү. Ага 2500дөн ашык полиция кызматкери катышты. Кагылышуулардын натыйжасында 64 адам каза болду, анын ичинде 4 полиция кызматкери бар. 8 полиция кызматкери жаракат алып, 81 адам камакка алынып, ондогон курал-жарактар конфискацияланды. Полиция 32 брондолгон унаанын, 2 тик учактын жана бир нече дрондордун жардамы менен ички райондорго кол салды.

Рио-де-Жанейро штатынын губернатору Клаудио Кастро социалдык тармактарда наркотерроризмге каршы күрөш жүрүп жатканын баса белгиледи.

Анын айтымында, полиция көп өлчөмдөгү баңгизаттарды тартып алган. Операция кылмыштуу топтун "аймактык экспансиясына каршы күрөшүүгө" багытталган. Ошол эле учурда Кастро федералдык өкмөткө жана куралдуу күчтөргө жардам сурап кайрылган, бирок армия брондолгон унаалар боюнча өтүнүчү үч жолу четке кагылганын билдирген. Президент Луис Инасиу Лула да Силванын администрациясы айыптоолорду "шайлоо алдындагы саясий кадам" деп атаган.

Шаарда эртең мененден бери ок атышуулар угулуп, топтун мүчөлөрү бир нече көчөлөрдү тосуп, алты автобусту басып алып, аларга тосмолорду курушкан.

Райондордун тургундары социалдык тармактарда күйүп жаткан автобустарды, түтүн тилкелерин жана тынымсыз ок атышууларды көрсөткөн видеолорду бөлүшүшкөн. Полициянын айтымында, кылмышкерлер дрондордон гранаталарды атышкан.

Университеттер, 46 мектеп жана 5 медициналык мекеме коопсуздук максатында убактылуу жабылып, коомдук транспорт токтотулган.

Кармалгандардын арасында "Кызыл команданын" лидерлеринин бири Тиаго ду Насименту Мендес жана анын шериги Николас Фернандес Соарес бар. Алар "Дока" же "Урсо" деген каймана аттары менен белгилүү.

Расмий өкүлдөрдүн айтымында, бул операция 2010-жылдагы белгилүү фавела салгылашууларынан да кеңири масштабда болгон. Андан кийин жоокерлер жана шектүүлөр менен кошо 30дан ашык адам каза болгон.

Эске салсак, мурда Мексикада полиция жолдун четинен алты кишинин кесилген баштарын тапкан. Баштардын териси сыйрылып, кылмыштуу топтордун бири тарабынан кол коюлган деп болжолдонгон жазуу жүзүндөгү документ менен кошо келген. Текст аймактагы зомбулукка айыпталган адамдарга багытталган жана аларга опузалоо жана киши өлтүрүү боюнча айып тагылган.