8-июлда Ысык-Ата аймактык ооруканасында жарык эки саатка өчүрүлгөн. Анын натыйжасында, кычкылтек концентраторундагы 68 жаштагы адам каза болду. Бул тууралуу анын жакын туугандары журналисттерге билдиришти.

Алардын айтымында, М. Ы.нын 13-июнда дене табы көтөрүлгөн. 15инде андан ПЧР анализи алынган, анын натыйжалары туугандарына дагы деле белгисиз. 18-июнда компьютердик томографияга түшкөндө андан эки тараптуу полисегменталдык бронхопневмония аныкталган.

"Биз ПЧР тесттин жыйынтыгын беш күн күттүк. 20-июнда аны Канттын ооруканасына алып барышты, себеби анын абалы начарлап кеткен. Ал эки жума ошол  ооруканада жаткан. Анын абалы бир аз начарлаганда реанимация бөлүмүнө которулган", - деди маркумдун туугандары.

8-июль күнү, эрте менен ооруканада жарык өчүп, кычкылтек концентратору иштебей калган. М.Ы. өзү туугандарына телефон чалып, бул жөнүндө кабарлоого жетишип, кайры кыска аралыкта чалууларга жооп берген эмес. Тааныштар аркылуу туугандарына РЭСтин жогорку чыңалуудагы электр линияларында кыска мөөнөткө өчүп калгандыгын айтышкан. Оорукананын генератору да кандайдыр бир себептерден улам дароо иштеген эмес. Оорукананын кызматкерлери бир нече мүнөткө жарык өчкөн деп ишендиришүүдө, бирок туугандарынын айтымында жарык эки сааттай жок болгон.

Электр жарыгы өчүрүлгөндөн 15-20 мүнөт өткөндөн кийин, бейтапка аба жетишпей, көз жумган.

Туугандарынын айтымында, ошол күнү алардын атасы гана каза болгон эмес.

"Аймактар ​​үчүн аябай коркунучтуу: ооруканаларда жөнөкөй эле жарык, суу жана башка коммуникациялар жок, төртүнчү муундагы антибиотиктерди айтпай эле койсо болот. "Түндүкэлектро" энергиясы үзгүлтүксүз берилиши жөнүндө кабар берип келет. Бул туура эмес", - деп сөзүн жыйынтыкташкан М.Ы.нын туугандары. Маркум 9-июлда жерге берилген.

"Түндүк электр" ААКнын жообу:

8-июлда эртең мененки саат 10: 10до, Чүй облусунун Кант шаарында жайгашкан Ысык-Ата ооруканасында электр жарыгы өчүрүлдү. Буга “МИС” 35/10 кВ подстанциясынан 35 кВ электр чубалгысынын бузулушу себеп болгон. Кийинчерээк, Ак-Кудук айыл өкмөтүнө караштуу Котовское айылында КамАЗ унаасы топурак түшүрүп жатканда аба электр чубалгыларын бузуп алганы маалым болгон.

Электр энергиясы өчүп калгандыгы жөнүндө сигналды алгандан кийин, ооруканада жайгашкан генераторду туташтырууга аракет жасалды, бирок бир нече мүнөттөн кийин иштебей калгандыктан, ал өчүрүлдү.

Саат 10: 43тө "Түндүкэлектро" ААКнын Кант бөлүштүрүү зонасынын ыкчам-оңдоо тобу оорукананы башка электр булагына туташтырды жана электр кубатын берүүнү калыбына келтирди.

Булак: NazarNews.kg