«Газпром» европалык компанияларга форс-мажордук жагдайдан улам Европага газ жеткирүүгө кепилдик бере албай турганы тууралуу билдирүү жөнөттү. Бул тууралуу каттын негизинде «Рейтер» жана «Блумберг» агенттиктери кабарлашты.

«Рейтер» маалымат булагы бул кабар «Түндүк агым 1» газ кууру аркылуу газды жеткирүүгө байланыштуу экенин билдирди.

«Газпромдун» каты 14-июлда жөнөтүлгөн. Анда форс-мажордун аякташ күнү көрсөтүлгөн эмес. Кат алган компаниялардын арасында орус газынын Германияга эң ири импорттоочусу болгон немис концерни Uniper да бар. Юнипер форс-мажордук дооматты негизсиз деп эсептей турганын билдирди.

Energy Aspects консалтинг компаниясынын өкүлү Тревор Сикорский Bloomberg агенттигине кайрылып, форс-мажордук жагдайлар тууралуу жарыялоо «жумшак айтканда, адаттан тыш көрүнүш» деп билдирди.

Анын айтымында, бул «Газпромдун» газ түтүгүн пландаштырылган оңдоо иштери аяктагандан кийин «Түндүк агым 1» аркылуу газ берүүнү кайра баштоону пландабаганын көрсөтүшү мүмкүн.

«Газпром» май айынан тарта Европага газ берүүнү азайта баштады. Июнь айынын ортосунда компания «Түндүк Агым 1» газ кууру (Украинадагы согуштан кийин орус газын Европага жеткирүүнүн негизги жолу болуп саналат) аркылуу газ ташуу көлөмү номиналдык кубаттуулуктун 40% чейин кыскарганын жарыялаган.

«Газпром» муну Выборгдогу Портовая компрессордук станциясы үчүн Siemens турбинасын оңдоодон кечиктирүү менен түшүндүрдү. Турбина Канадага оңдоого жөнөтүлгөн жана согуш башталгандан кийин санкцияларга дуушар болгон. Кийинчерээк Канада Германиянын талабы боюнча турбинаны Орусияга кайтарып берүүгө макул болгон.

11-июлдан 21-июлга чейин «Түндүк Агым» аркылуу жеткирүү пландуу оңдоо иштерине байланыштуу расмий түрдө токтотулган. Европада «чоңдор» Орусия газ берүүнү калыбына келтирбейт жана санкцияларды алып салуу үчүн газ шантажына барышы мүмкүн деп кооптонууда. Москва газды саясий кысым үчүн колдонгонун четке кагууда.

Булак: NazarNews.kg