Францияда айыккыс оор дартка чалдыккан бойго жеткен жарандарга белгилүү шарттарда медициналык жардам менен өмүрүн токтотууга укук берген мыйзам расмий түрдө күчүнө кирди.

Документ Франциянын Конституциялык кеңеши тарабынан өлкөнүн Баш мыйзамына шайкеш деп табылып, расмий журналда жарыяланды.

Мыйзам чыдагыс азап жараткан оор жана айыккыс илдетке чалдыккан бойго жеткен жарандарга жана Франциянын туруктуу жашоочуларына тиешелүү.

Процедураны өткөрүү чечими бейтаптын абалы бааланып, дарыгердин корутундусу алынгандан кийин атайын комиссия тарабынан кабыл алынат. Макулдук берилгенден кийин бейтап кеминде эки күн күтүп, процедура башталган күнү чечимин кайра ырасташы керек. Ошол эле учурда ал каалаган этапта процедурадан баш тарта алат.

Жалпы эреже боюнча, өлүмгө алып келүүчү препаратты бейтап өзү кабыл алат. Эгер физикалык абалы буга мүмкүнчүлүк бербесе, препаратты медицина кызматкери сайып бере алат.

Буга чейин Францияда бейтаптардын өмүрдү кармап туруучу дарылоодон баш тартуусуна жана айрым учурларда терең седация колдонууга уруксат берилген. Бирок өмүрдү токтотууга түздөн-түз медициналык жардам көрсөтүүгө тыюу салынган.

Мыйзамды Франциянын президенти Эммануэль Макрон 2022-жылдагы шайлоо өнөктүгүндө эле колдоп чыккан. Ал жаңы мыйзамды узакка созулган демократиялык талкуунун жыйынтыгы катары баалаган.

Ошол эле учурда документ бир катар медициналык жана диний уюмдардын сынына кабылды. Каршы тараптар мыйзамда каралган кепилдиктер аялуу адамдарды жетиштүү коргой албайт деп эсептешет. Айрыкча акыркы чечимге чейин каралган эки күндүк мөөнөт боюнча суроолор айтылган.

Конституциялык кеңеш мыйзамды толугу менен күчүндө калтырганы менен айрым жоболорун тактаган. Анын ичинде абийирине байланыштуу процедурага катышуудан баш тартуу укугу дарыгерлер менен медайымдардан тышкары фармацевттерге да берилди.

Мындай укук жеке медициналык мекемелерге, анын ичинде диний уюмдарга да каралган. Бирок аймакта мындай кызматты көрсөтө алган жалгыз мекеме болсо, ал процедураны өткөрүүдөн баш тарта албайт.