Кыргыз Республикасынын Ички иштер министри, милициянын генерал-майору Кашкар Джунушалиев жана  Иран Ислам Республикасынын Ички иштер министри Абдолреза Рахмани Фазли "Ата-Бейит" тарыхый-мемориалдык комплексине барышты. Бул тууралуу ИИМдин маалымат кызматынан билдиришти.

Маалыматка ылайык, Иран ИИМнин башчысы жана Кыргызстандын  ИИМ министри 1916-жылкы каргашалуу окуяларда курман болгондордун  мемориалына,  саясий репрессиялардын курмандыктарынын эстелик-мемориалына гүл коюшту.

Делегациянын  өкүлдөрүнө "Ата-Бейит"  мемориалдык комплексинин тарыхы жөнүндө айтып беришти. 1937-жылы 137 адам атылган, 70 жылдан кийин кайра жерге берилген, ал эми 1991-жылы алардын элесине арналып, ушул мемориал тургузулган. Бул жерде Жусуп Абдрахманов, Төрөкул Айтматов, Касым Тыныстанов жана башка чыгаан мамлекеттик жана коомдук ишмерлердин сөөктөрү коюлган. Чыңгыз Айтматовдун сунушу менен мемориал "Ата-Бейит" деп аталган.

Ошондой эле, министрлер жана делегациянын өкүлдөрү улуу жазуучу Чыңгыз Айтматовдун көрүстөнүнө гүл коюп, эскеришти.

Булак: "NazarNews.kg"