Мамлекеттик бажы кызматынын төрагасы А.А. Салиев «Иркештам» өткөрүү пунктуна барып, анын ишмердүүлүгү жана модернизациялоо долбоорунун жүрүшү менен таанышты.

Иш сапар 2026-жылдын 16-июлунда бажы органдарынын иши менен таанышуу алкагында өттү. Анда өткөрүү пунктунун үзгүлтүксүз иштешин камсыз кылуу, мамлекеттик көзөмөл органдарынын ишин уюштуруу жана жарандар менен ишкерлер үчүн ыңгайлуу шарттарды түзүү маселелери каралды.

МБКнын төрагасы «Иркештам» өткөрүү пунктунун стратегиялык маанисин белгиледи. Аталган пункт Борбордук Азия менен Кытай Эл Республикасын байланыштырган негизги транзиттик багыттардын бири болуп саналат.

Маалыматка ылайык, учурда Мамлекеттик бажы кызматы өткөрүү пунктун комплекстүү модернизациялоо иштерин жүргүзүүдө.

Долбоор аяктагандан кийин анын өткөрүү жөндөмдүүлүгү бир багытта күнүнө эмес, долбоордук көрсөткүч боюнча 1000 транспорт каражатына чейин жетери пландалууда.

Модернизациянын алкагында төмөнкү иштер аткарылууда:
өткөрүү пунктунун аймагы 8 гектарга чейин кеңейтилүүдө;
жаңы объектилер курулуп, автоунаа тилкелеринин саны көбөйтүлүүдө (кирүү үчүн 6, чыгуу үчүн 4 тилке);
саатына 120 транспорт каражатын текшерүүгө жөндөмдүү заманбап инспекциялык-текшерүү комплекси курулууда;
жол инфраструктурасы өнүктүрүлүүдө;
кошумча аянтчалар курулууда.

Иш сапардын жыйынтыгында тышкы экономикалык ишмердүүлүктүн катышуучулары менен өз ара аракеттенүүнү жакшыртуу, көзөмөл органдарынын кызматташтыгын күчөтүү жана өткөрүү пунктундагы иштерди тездетүү боюнча тиешелүү тапшырмалар берилди.

Ошондой эле «ГТИ» ААКсына курулуш иштерин ыкчамдатуу, подряддык уюмдар жана тиешелүү мамлекеттик органдар менен ишти күчөтүү аркылуу жаңыланган «Иркештам» өткөрүү пунктун мүмкүн болушунча эртерээк ишке киргизүү тапшырылды.