Бишкекте Өзбекстан Республикасынын Президенти Шавкат Мирзиёев тууралуу «Жаңы Өзбекстан: Шавкат Мирзиёевдин жолу» аттуу китептин кыргыз тилиндеги басылышынын бет ачары өттү.

Иш-чара 2026-жылдын 21-июлунда Алыкул Осмонов атындагы Кыргыз Республикасынын Улуттук китепканасында уюштурулду.

Ага Кыргыз Республикасынын Мамлекеттик катчысы Арслан Койчиев, Маданият, маалымат жана жаштар саясаты министринин орун басары Салкын Сарнагоева, Кыргызстандын Өзбекстандагы элчиси Дүйшөнкул Чотонов, Өзбекстандын Кыргызстандагы элчиси Саидикрам Ниязходжаев, ошондой эле эки өлкөнүн илимий жана чыгармачыл интеллигенция өкүлдөрү катышты.

Иш-чаранын жүрүшүндө китептин илимий-аналитикалык мааниси белгиленип, анын кыргыз тилинде жарык көрүшү Кыргызстан менен Өзбекстандын ортосундагы маданий-гуманитардык байланыштарды бекемдөөгө салым кошору айтылды.

Басылмада Өзбекстандын акыркы жылдардагы коомдук-саясий жана социалдык-экономикалык өнүгүүсү, мамлекеттик башкаруу тармагындагы реформалар, өлкөнүн стратегиялык багыттары жана эл аралык кызматташтыктагы жаңы мамилелер кеңири талданат.

Китеп буга чейин англис, араб, орус жана башка тилдерде жарык көрүп, АКШнын Вашингтон шаарында, Конгресс китепканасында, БУУнун Женевадагы Тынчтык сарайында жана башка эл аралык аянтчаларда тааныштырылган.

Авторлордун эмгеги заманбап Өзбекстандын өнүгүү жолун, жүргүзүлүп жаткан реформалардын мазмунун жана Борбордук Азиядагы өзгөрүүлөрдү изилдеген саясат таануучулар, дипломаттар, илимий кызматкерлер, студенттер жана окурмандар үчүн баалуу булак катары бааланууда.