Бүгүн, 20-февралда Жогорку Кеңеште «Согуштун, Куралдуу күчтөрдүн ардагерлери, ооруктагы эмгекчилер жөнүндө» КР мыйзамына өзгөртүүлөрдү киргизүү жөнүндө» мыйзам долбоору каралып, экинчи окууда добуш берүүгө жөнөтүлдү. Мыйзам долбоорунун демилгечиси – Жогорку Кеңештин депутаты Исхак Пирматов.

Демилгечи мыйзам долбоору аркылуу КПСС БК тарабынан кезинде Ооганстанга саясий иштерди жүргүзүү үчүн жиберилген партиялык жана советтик кызматкерлердин статусун согуш ардагерлерине теңдештирүү сунушун киргизүүдө.

“Кыргызстандан Ооганстанга ушундай тапшырма менен 4 кызматкер жиберилген, азыр көзү тирүү бир адам бар Согуш ардагери макамы жок болгондуктан, жеңилдиктер каралган эмес. Аларга согуш ардагери макамын берүү зарыл”, - деди Исхак Пирматов.

Депутат Исхак Масалиев бир киши үчүн мыйзам жазуу туура эмес экенин белгиледи.

“Мыйзам жазып отурбай, өкмөт бир кишинин маселесин өзү эле чечип койсо болмок. Чече албаса, андай өкмөттүн кимге кереги бар”, - деди ал.

Ал эми депутат Бактыбек Турусбековдун пикиринде, бир адамга тийиштүү болсо дагы, мыйзам долбоорун колдош керек. Мындай пикирди депутат Умбеталы Кыдыралиев дагы колдоду.

Белгилей кетсек, ушу тапта Кыргызстанда Улуу Ата мекендик согуштун 268 ардагери, ооруктун 1300 ардагери жашайт. Ал эми Ооган согушуна катышкан 5 миңден ашуун ардагер бар. Аларга совет мезгилинде берилген жеңилдиктер азыр кыйла кыскарып калган.

Булак: NazarNews.kg