Израилдин, палестиналык Хамас кыймылынын, АКШ жана Катардын өкүлдөрү 16-январдын кечинде Дохада расмий түрдө Газа тилкесинде барымтадагыларды бошотуу жана ок атышууну токтотуу келишимине кол коюшту. Бул тууралуу Axios порталы булактарга таянуу менен билдирди.

Алардын айтымында, келишимди АКШнын жаңы шайланган президенти Дональд Трамптын Жакынкы Чыгыш боюнча атайын өкүлү Стивен Виткофф, Ак үйдүн Улуттук коопсуздук кеңешинин Жакынкы Чыгыш жана Түндүк Африка боюнча координатору Бретт Макгурк жана Катар менен Египеттин ортомчулары талкуулашты. Америкалык тараптан келишимге Бретт Макгурк кол койгон.

Израилдин премьер-министри Биньямин Нетаньяхунун кеңсеси Израил, Палестинанын Хамас кыймылы, АКШ жана Катар тарабынан барымтадагыларды бошотуу жана Газа тилкесинде ок атышпоо келишимине кол коюлганын ырастады. Анын айтымында, келишимди бекитүү үчүн коопсуздук министрлеринин кабинети чакырылып, андан кийин өкмөттүн жыйыны болот. Добуш берүү 18-январда болот.

Axios булактарынын айтымында, келишим 20-январда күчүнө кирет.

Порталдын маалыматына караганда, документке кол коюу келишим боюнча бошотула турган палестиналык туткундардын акыркы тизмеси боюнча пикир келишпестиктерден улам кийинкиге жылдырылды. Хамас террордук актыларды уюштурган деп айыпталып, алмашуу учурунда өмүр бою эркинен ажыратылган топтун аскер башчыларын кайтарууну талап кылды.

Аль-Арабия телеканалы өз булактарына таянып кабарлагандай, Хамас менен Израил Газа тилкесинде ок атышууну токтотуу жана анклавдагы барымтадагыларды палестиналык туткундарга алмаштыруу келишимине кол коюшту. Документке акыркы түзөтүүлөр киргизилгенин маалымат булактары билдирди. Телеканал Хамас менен Израилдин ортосунда арачы болгон жана Газа тилкесиндеги ок атышпоо келишиминин шарттарынын аткарылышынын кепилдиги болгон Катар, Египет жана АКШнын да кол койгондордун арасында бар же жок экенин тактаган жок.

Алибек Бейжанов, Ташкен