Камактагы эркин журналист Канышай Мамыркулова СИЗОдон кайрылуу кат жазды.

Төмөндө текст өзгөртүүсүз берилди: 

"Бул кат менин дартым же арманым эмес. Тараптар ойлонуп, бири-биринин убалына калбай,бир келген жашоодо АДАМ болуп өтүү керек экендигин көздөгөн оң. 

Мен адам өлтүргөнүм, мамлекетти тоногонум, пара алганым жок. Коомчулуктун укуктук, саясый, экономикалык, социалдык, маселелерин эле пост кылып чагылдырып келдим. Ал эми мага козголгон кылмыш иши боюнча айтсам, КЖКнын 278 беренесинин 3-бөлүмү жана 330 беренесинин 1- бөлүгүнө жаткан кылмышты эч качан жасаган эмесмин жана жасабайм. Муну тараптардын бардыгы жакшы билишет.  

Коомчулуктун каалаганын каалагандай формада жазып, көкөйлөрүнө тийген үчүн асмандан-жерден алып, кылмыш иш “токулду”. Муну өздөрү дагы, юристтер, адвокаттар дагы, укук коргоо тармагы менен тыгыз иштешкен адам катары өзүм дагы жакшы билем. Балким, кыйналган катмардын жашоосун көрүшүмдү Жараткан Орозонун күнүндө буюргандыр, пенде баласы унутчаак экенин мен аркылуу коомго туюнтуп жаткан чыгаар... 

Кандай болгон күндө дагы тараптар “маскаларды” чечкени оң болот. Бийлик үчүн мен кылмыш кылганым жок. ООНго чейин арызданып, Атай Бейшенбек баш болуп, фб колдонуучулар төш болуп, “Агрессор” деп үч жыл мурун кыйкырганда кылмыш болбойт. Ошону эстетип койгон мага кылмыш иши илинип калабы? Акты ак, көктү көк дейли. Бул өмүр кыска, ширеңкедей эле, акыбызды жешпейли. 

Кыргыз бийлиги жана ага кызмат кылгандар каалаганына жетти. Буга деле таарыныч, азырынча жок, анткени менин ишим шаардык сотто каралат. Ушуга чейин Алмаз Атамбаев, Өмүрбек Текебаев, Адахан Мадумаров, кемпир-абадчылар, журналисттер, айтор камалган “запкы жедик” дегендин бардыгына фб да какшап, колдоо көрсөтүп келгем. Бул үчүн мени эч ким жалдаган эмес. “Жарандык милдетим” деп гана акыйкатты, калыстыкты айтып келдим, бүгүн колдоого муктажмын. 

Бүгүнкү күнгө чейин колдоп жаткан жалпыга маалымдоо каражаттарына, кесиптештерге, айрыкча “Институт Медиа полиси” жана “Кылым шамы” уюмуна, Акынбек Ногоевге, Асел Аргымбаевага, Нурбек Сыдыковго, Акмат Алагушевге, Мунарбек байкеге, бүгүнкүгө чейин кабар алып жаткан мамилелеш жакындарга ыраазычылык билдирем. Албетте, тизме узун болгондуктан жаза албадым ЖҮРӨГҮМДӨСҮҢӨР!

Булардын сап башында Азиза эже тургандыгы талашсыз. 

Ток этээри, “эже сизди, сиздин принциптерди сыйлайбыз” деп кулагыма айткан, фб га жазган санаалаштардын бардыгын, коомчулукту, Бишкек шаардык сотунда карала турган ишке байланыштуу келип, колдоп берүүңуздөрдү өтүнөм.  

Сөз иш менен бекемделгени жакшы. Өзүм дагы өпкөлөбөй чын эле чындык сүйүүчүлөр канча адам экенин көрөйүн. Бийлик дагы ошого жараша чечим чыгарсын. Туурасын айтканда тараптар жылтырабай, ток этээри, туураны туура, катаны ката деп кабылдайлы. Колдоочулар аз болсо, бийлик жеңди, салмактап, ишти көздөн өткөрүп, үй камакка чыгарсын, колдой албаган коомчулуктун акысы, таарынычы дагы жок болот. “Эркек эже” деп жазып, бирок, колдой албагандар үчүн “Саясый юбка” тигип, дачага кете берем. Ошону менен калп эле акыйкат, чындык, Принцип 

деп кыйкыргандардын жүзү белгилүү болот. Мен бийликтин кыжырын кайнатпайм. 

Кошоматчылар билгенин кыла берет, баарыбыз ынтымактуу жашайбыз. Кыргыз бийлигине жана укук коргоо органдарына менин дээрлик зарылдыгым деле жок, таптакыр башка иштер менен алек болушум мүмкүн, колдоо кыла албаган коомчулуктун таламын талаштын зарылдыгы жок. Ток этээри ушул. Кимдин көңүлүн оорутуп, жазган болсом, албетте, кечирим сурайм, өзүмдүн көңүлүм миң эсе түшүп турат.

Абам менен досуна, албетте салам жолдойм, шаардык сотко Канышай Мамыркулованы колдоп келген адамдардын санына карап, чечим чыгара беришсин, капачылыгым болбойт. 

«Эжеке, инилериңиз кандай абал болбосун колдойбуз, сиздин принциптүү, калыс мүнөзүңуздү сыйлайбыз” деген көптөгөн инилерим колдоп, сотко келип бере алышпаса, эжеке айла жок, тизелейт, туурасы ушул, коомчулук түшүнөт, туугандарым наалып басылышат, фейктер жамандайт, ошону менен мезгилдер өтө берет. 

СИЗОдон чыксам элдин бетин түз карайм, бетим күйгөн жок, кылмыш кылган эмесмин. Айрымдар, карайбы? Аны жараткандын каалоосу билет чыгаар. Ар бириңиздерге салам жолдоп, үмүт кылган Канышай Мамыркулова", - деп жазылган катта.

Эскерте кетсек, милиция Канышай Мамыркулованы 20-мартта үйүнөн кармап кеткен.

Кийинчерээк милиция Мамыркуловага соцтармактагы жазгандары үчүн «массалык башаламандыктарга чакырыктар» беренеси менен иш козголгонун билдирген.

Анын жактоочусу Нурбек Сыдыков Мамыркуловага соцтармактагы жазгандары үчүн кылмыш иши козголгонун айткан. Ал билдиргендей, Мамыркулова мыйзамда каралган укугунан пайдаланып, соцтармактагы баракчасы аркылуу өз ой-пикирин билдиргенин, мыйзам бузбаганын жана массалык башаламандыктарга чакырык жасабаганын айткан.

Канышай Мамыркулова – таанымал журналисттердин бири. Акыркы жылдары ал «Фейсбук» аркылуу бийликке ачуу сын айтып келет. Ал кыргыз-өзбек жана кыргыз-тажик чек ара келишимдери боюнча да бийликке сын айткан.

22-мартта Бишкектин Свердлов райондук соту журналист, активист Канышай Мамыркулованы эки айга камакка алуу чечимин чыгарган.