Казакстан Республикасынын Тышкы иштер министрлигинин расмий өкүлү Ерлан Жетыбаев Кара деңизде танкерлерге учкучсуз учуучу аппараттар (УУА) менен жасалган чабуулдар боюнча билдирүү жасады, деп маалымдайт NUR.KZ.

Казакстан Республикасынын Тышкы иштер министрлиги 13-январда Кара деңиздин акваториясында Каспий түтүк консорциумунун (КТК) деңиз терминалына багыт алган үч танкерге учкучсуз дрондор тарабынан жасалган чабуулдарга байланыштуу «олуттуу тынчсыздануусун» билдирди.

«Бир катар европалык мамлекеттердин элчилери менен өткөрүлгөн шашылыш жолугушууларда, ошондой эле америкалык тарап жана башка чет элдик өнөктөштөр менен болгон байланыштардын алкагында көмүрсутектерди, анын ичинде деңиз жолдору аркылуу ташуунун коопсуздугун камсыз кылуу үчүн эл аралык укуктун нормаларына так ылайык натыйжалуу чараларды көрүүнүн зарылдыгы баса белгиленди», — деп айтылат билдирүүдө.

Казакстандын ТИМи «эч кандай куралдуу кагылышуунун тарабы эместигин, глобалдык жана европалык энергетикалык коопсуздукту бекемдөөгө олуттуу салым кошуп жатканын жана эл аралык белгиленген нормаларга толук ылайык энергетикалык ресурстарды үзгүлтүксүз жеткирүүнү камсыз кылып жатканын» белгиледи.

«Ушуга байланыштуу, аталган танкерлер бардык зарыл уруксаттарга ээ болуп, талап кылынган идентификациялык жабдуулар менен жабдылганын белгилеп кетебиз.

Инциденттердин санынын өсүшү эл аралык энергетикалык инфраструктуранын иштешине болгон коркунучтардын күчөп жатканын көрсөтөт жана мындай учурларды келечекте болтурбоо үчүн биргелешкен чараларды иштеп чыгууда өнөктөштөрдү тыгыз кызматташууга чакырабыз», — деп билдиришти ТИМде.

Эске салсак, 13-январда «КазМунайГаз» компаниясы казакстандык мунайды ташыган танкерлерге дрондор менен чабуул жасалганы тууралуу интернеттеги маалыматтарга жооп берген.

Ошондой эле Казакстан Республикасынын Энергетика министрлиги Кара деңиздин акваториясында, КТКнын деңиз терминалынын аймагында казакстандык экспорттук мунайды ташууга тартылган эки кеме менен болгон инциденттер тууралуу маалыматты расмий түрдө тастыктаган.

14-январда депутат Айдос Сарым Каспий түтүк консорциумуна жасалган акыркы чабуулдар тууралуу өз пикирин билдирди. Анын айтымында, бул маселеде АКШ Украинага басым жасашы керек.