Кордайдагы массалык башаламандыктан Кыргызстанга качып келип дарыланып жаткан Казакстандын жарандары өз өлкөсүнө жөнөтүлдү. Бул туурасында Саламаттык сактоо министрлигинин маалымат кызматы кабарлады.

Билдирүүгө ылайык, бүгүн, 9-февралда, Казакстандан саламаттык сактоо министринин орун басары Камалжан Надыров башында турган делегация Бишкекке келген. Алар КР саламаттык сактоо министринин орун басары Мадемин Каратаев менен биргеликте Чүй облусундагы медициналык мекемелерде жаткан жарандарынын абалы менен таанышкан.

“Камалжан Надиров жарандарына убагында медициналык жардам көрсөткөнү үчүн кыргыз өкмөтүнө ыраазычылык билдирди. Ошондой эле делегация Кыргызстан элдеринин ассамблеясынын өкүлдөрү менен жолугуп жаракат алгандар мындан ары Казакстанда дарыланарын түшүндүрдү. Жолугушуулардын жана бейтаптар менен сүйлөшүүнүн натыйжасында сегиз жаранды Казакстандын санавиация кызматынын реанимобилдери менен Алматы шаарына алып кетишти”, — деп айтылат маалыматта.

Бүгүнкү күндө Токмок аймактык ооруканасында жана Ивановкадагы Жалпы дарыгерлик практика борборунда Казакстандын беш жараны дарыгерлердин жана психологдордун көзөмөлүндө жатат. Баарынын абалы туруктуу.

Коңшу өлкөнүн вице-министри жарандарына медициналык жардам көрсөткөнү үчүн кыргыз өкмөтүнө ыраазычылык билдирди.

Эске сала кетсек, 8-февралга караган түнү Казакстандын Кордай районундагы Масанчи, Сортөбе, Каракемер айылдарындагы башаламандыктан сегиз адам каза болуп, ондогон адам жараат алган. Бир топ турак үй, имараттар өрттөлгөн.

Ал эми учурдагы такталган маалыматтар боюнча жаңжалдан каза болгондордун саны 10го жетти.

Буга чейин Казакстандын президенти Касым-Жомарт Токаев бир нече айылдын тургундары ортосундагы жапырт мушташты чагымчылдар колдонуп кеткенин белгилеген. Бул айылдарда казактардан тышкары дунгандар да жашайт.

Казакстандын вице-премьери Бердибек Сапарбаев президенттин тапшырмасы менен 7-февралдан 8-февралга караган түнү болгон окуяга байланыштуу Кордай районунун Масанчи айылына келип, жабыркагандар менен жеринен таанышты.

12 адам ооруканага жаткырылып, 20 адам жеңил жаракат алган. Аны менен бирге эле 127 адамга медициналык жардам көрсөтүлүп, 84 адам текшерүүдөн кийин үйүнө жиберилген.  

Мындан улам чатак этникалык мүнөздө экени айтылууда. Казакстандын жаңжал чыккан бул айылдары Кыргызстандын Токмок шаарына тушташ, Чу дарыясынын аркы тарабында жайгашкан. Буга байланыштуу Кыргызстандын Чек ара кызматы Казакстан менен чек арадагы бекеттердин ишин күчөтүлгөн тартипке өткөргөн.

Булак: NazarNews.kg