Улуттук коопсуздук боюнча мамлекеттик комитеттин төрагасы Камчыбек Ташиев парламенттик шайлоодо кайсы бир партиянын пайдасына мамлекеттик ишканалардан акча чогултулганы тууралуу иш боюнча маалымат берди. 24-декабрда ал журналисттердин президенттин парламенттеги мурдагы ыйгарым укуктуу өкүлү Курманбек Дыйканбаевдин жана Экономикалык кылмыштарга каршы мамлекеттик кызматтын (Финпол) мурдагы жетекчиси Бакир Таировдун кармалышы боюнча айтп берди.

Курманбек Дыйканбаев бир мамлекеттик ишканадан 7 миллион сомго чейин акча алган. Ишкананын башчысы, ошол жерде берген адамдар мунун баарын толук тастыктаган. Ушул эле маселе Мамлекеттик каттоо кызматында да болгон. Кол астындагылардан акча чогултуп беришкен. Айрым жетекчилер кармалды, алардын артынан Таиров камалып отурат

Медет Ирсалиев жетекчи болуп турган Соцфонддун жетекчилери ар бир райондук башкармалыктан 40-45 миң сомдон акча чогултуп, бир партияны каржылашкан. Өзүлөрү арыз берип жатышат.

УКМК Таировду камакка алып, ал октябрдагы парламенттик шайлоо үчүн мамлекеттик мекемелерден акча чогулткан деп шек саналып жатканын билдирген. Атайын кызмат ушундай эле шек менен Дыйканбаевди да кармаган. Алар өзүлөрү же жактоочулары коюлган айыптар тууралуу комментарий берише элек. Дыйканбаев шайлоого «Биримдик» партиясынын тизмеси менен катышып, анын шайлоо фондуна 1 миллион 500 миң сом которгон.

Азизбек КЕЛДИБЕКОВ, NazarNews.kg