УКМКнын кызматкерлери «Хизб ут-Тахрир» диний экстремисттик уюмдун лидерин кармады. Ал чет өлкөнүн жараны, деп билдирди бүгүн, 9-ноябрда комитеттин басма сөз кызматы.

«Өзбекстандын укук коргоо органдары издеп жаткан Ш.Ш. Ош шаарынын аймагынан 4-ноябрда кармалган. Ал «Хизб ут-Тахрир» уюмунда Өзбекстан боюнча жооптуу болуп, өлкөнүн түштүк аймагында уюмдун түзүмүн бекемдөө иштерин активдүү жүргүзүп келген», - деп айтылат расмий маалыматта.

УКМК тактаган маалымат боюнча, Ш.Ш. өздүгүн аныктоочу жасалма документ менен Кыргызстандын аймагында жашырынып жүргөн. Шектүү УКМКнын абагына убактылуу камакка алынды.

Булак: NazarNews.kg