Прокуратура кызматкерлери жумуш учурунда каза болсо төлөнүүчү компенсациянын суммасын 12 эсеге азайтуу сунушталды. Тиешелүү мыйзам долбоорун Финансы министрлиги демилгелеп, парламенттин конституциялык мыйзамдар, мамлекеттик түзүлүш, сот укук маселелер комитетине финансы министринин орун басары Алмазбек Бакетаев алып келди.

"Кыргыз Республикасынын прокуратурасы жөнүндө" конституциялык мыйзамга өзгөртүү сунушталууда.

"Коомчулукта каза болгон прокурорго берилчү 21 миллион сомдук компенсация көп эмеспи деген сындар айтылган. Өзүңүздөр билгендей, 2021-2022-жылдары өлкөнүн бардык тармактарында маяналар жогорулаган, анын ичинде прокурорлордуку да көбөйгөн. Ошого байланыштуу ушундай сумма чыгып кетти. Ага чейинки төлөмдөр 9 миллион сомдун тегерегинде болчу. Биз сунуштаган мыйзам долбоору кабыл алынса орто эсеп менен 1,5 миллион сом төлөнүп калат", — деди Бакетаев.

Финансы министринин айтымында, долбоордо төмөнкүдөй өзгөртүүлөрдү киргизүү каралган:

прокурор кызматтык милдетин аткарып жатып көз жумса, үй-бүлөсүнө анын акыркы кызмат орду боюнча 20 орточо айлык эмгек акысынын өлчөмүндө бир жолку жөлөк пул төлөнөт (учурда 20 жылдык маянасы берилет);

I топтогу майып болуп калса — 10 орточо айлык эмгек акы (учурда 10 жылдык маяна);

II топтогу майыпка — 8 орточо айлык эмгек акы (учурда 8 жылдык маяна)

III топтогу майыпка — 5 орточо айлык эмгек акы (учурда 5 жылдык).

Белгилей кетсек, былтыр июль айында Чаткал районунун прокурору Бакирдин Жанузаков Бишкектен баратканда автоунаасы аласалып каза болгон. Мындан улам анын үй-бүлөсүнө 21,7 миллион сом компенсация берүү маселеси Жогорку Кеңешке киргизилген. Аталган норма коомчулукта түрдүү сын пикирлерди жараткан. 

Булак: NazarNews.kg