Жамбыл облусунун Кордай районунда бардык мектептер жана бала бакчалар иштеп баштады. Бул тууралуу казак маалымат булактары жазып чыгышты.

Алардын айтымында чыр чыккан Масанчи, Аухатты, Сортобе айылдарында 9 мектеп бар.  Алардын 8и иштеп баштады. Бир мектепте гана  оперативдик штаб бар болгондуктан, окуучуларды башка мектепке которушкан.

Бала бакчалардын 7си иштеп, ага 1 350 балдар барууда.

Кордай районуна гуманитардык жардамдарды-тамак-аш, гигиеналык, кир жуучу каражаттар жана дары-дармектер жеткирилип берилген.

Маалыматка караганда 5 тонна ун, 3 тонна күрүч, бир нече тонна шекер ж. б. товарлар таратылган.

Казакстандын ИИМинин айтымында тургундардын коопсуздугун камсыздоо максатында полиция кызматы күнү-түнү иштеп жатат. Алар автотранспорттордун кыймыл-аракетин тыкыр көзөмөлдөп, жүргүнчүлөрдүн документтерин текшеришүүдө.

Эскерте кетсек, кечээ, 9-февралда Масанчи айылында каза болгондорду көмүү зыйнаты башталды. Тартип бузгандардан үйүн жалгыз  коргоп каза болгон 6 баланын атасы 47 жаштагы Рамзан Харсаровдун сөөгү акыркы сапарга узатылды. Ал эми Сортобе айылында казак тили жана информатика мугалими-Малик Ясаровдун тажыясы болуп өткөн.

Полиция баш-аламандыкты уюштургандар жана чакыргандар жазасыз калбашына ишентиришүүдө.

Булак: NazarNews.kg