Түркмөнстанда дээрлик ар бир үй-бүлөдө коронавирус жуктурган же андан улам каза болгон учурлар кездешүүдө. Ал эми көрүстөндөрдөгү жай казгандар "конвейердик режимде" иштеп жатышат. 

Өлүкканалардан сөөктөрдү целлофан баштыктарга салынып берилүүдө, - деп билдирет "Азатлык" радиосу. 

COVID-19 Түркмөнстанда расмий каттала элек. Ал эми президент да, өкмөт дагы азырынча бул окуяга байланыштуу үн ката элек. 

Ашхабаддын борбордук өлүкканаларында маркумдардын сөөгүн полиэтиленге салып беришкен. "Денеси целлофан баштыкка оролуп, үстүнө хлор сууга малынган чүпүрөк менен оролуп, андан кийин анын сөөгүн көмүү үчүн туугандарына өткөрүп берилди", - деди "Азатлык" радиосунун кабарчысы 23-июлда.

Айрым жерлерде, тургундар бул ыкмага каршы. "Салтка ылайык, өлгөндөрдү кичи мекенине көмүү үчүн алып кетишет. Ашхабаддан бир нече өлгөн адамдарды Ноххурга алып келишкенден кийин, тургундар ооруп калышты. Эми алар өлүктөрдү алып келүүнү токтотууну талап кылышууда", - деди "Азатлык" радиосунун Ашхабаддагы кабарчысы.

Өлкөнүн медициналык мекемелеринде маркумдун сөөгүн ороп жүрүүчү желим баштыктардын тартыштыгы, ооруканаларда жана карантиндик аймактарда дары-дармектердин жетишсиздиги байкалууда.

Журналисттер учурда ооруканалар толгон, дары-дармек жетишсиз, бейтаптарды тейлөө канааттандырарлык эмес деп ырасташууда. Мындай шартта жаңы карантин зоналары ачылууда. Көпчүлүгү үйдө дарыланууну туура көрүшүүдө.

Ашхабадда бир күндө кеминде алты адам COVID-19 белгилери менен оорудан каза болуп, көрүстөндө жүздөгөн жаңы мүрзөлөр пайда болгондугун жергиликтүү басылмалар жазып чыгышты.

Булак: NazarNews.kg