КР мамлекеттик гимнин автору Шабданбек Кулуев 80 жашында жарык дүйнө менен коштошту. Бул тууралуу активист Аманбол Бабакулов билдирди.

Эске сала кетсек, Шабданбек Кулуев Жумгал районуна караштуу Чаек айылында 1942-жылы 1-январда туулган. 1966-жылы Кыргыз мамлекеттик университетинин механика-математика факультетин аяктаган.

Эмгек жолун 1963-жылы, Суусамыр өрөөнүндөгү 8-март, Каракол башталгыч мектептеринде мугалим болуп иштөөдөн баштаган. 1969–1990-жж. Жумгал районунун Жумгал айылында М.В.Фрунзе атындагы орто мектептерде тарбиялык иштер боюнча директордун орун басары, директор, 1990–2006-жж. Жайыл районунун Түркмөн атындагы орто мектебинде математика мугалими болуп иштеген. Ошондой эле республикалык “Кыргыз туусу” гезитинин штаттан тышкаркы кабарчысы болгон.

1987-жылы “Эмгек ардагери” медалы, 1993-жылы “Кыргыз Республикасынын эл агартуусунун отличниги” төш белгиси берилген. Кулуев, Кыргыз Республикасынын Мамлекеттик гимнинин автору жана 1994-жылы “Кыргыз Республикасынын маданиятына эмгек сиңирген ишмер” наамы берилген.

2002-жылы Кыргыз Республикасынын Ардак грамотасын алган. “Жайыл районунун Ардактуу атуулу”. 2003-жылы “Кыргыз Республикасынын алдында өзгөчө эмгеги үчүн” пенсиясы ыйгарылган жана Кыргыз Республикасынын Чүй облусунун “Кеменгер” төш белгисинин ээси.

1991-жылдан Кыргыз Республикасынын Жазуучулар союзунун мүчөсү. 2011-жылдан "Кыргыз Республикасынын эл мугалими" ардактуу наамына ээ болгон.

Кыргызстандагы белгилүү журналист Элнура Кулуеванын атасы Шабданбек Кулуевдин арты кайрылуу болсун. Жакындарына терең кайгыруу менен көңүл айтабыз.