Кытайлык куткаруучулар тобу издөө-куткаруу жана жер титирөөдөн жабыркагандарга жардам берүү иш-чараларына катышуу үчүн 8-февраль күнү эртең менен Түркиянын түштүгүндөгү Адана шаарына келди. Мындай маалыматты NazarNews маалымат агенттигине кытайлык CCTV plus агенттиги билдирди.

Түркиянын талабы боюнча Кытай өкмөтү жөнөткөн куткаруу тобун ташыган учак шейшемби күнү саат 22:00 чамасында Пекинден учуп, 10 сааттан ашык учуудан кийин жергиликтүү убакыт боюнча саат 04:30да Аданага конду.

82 адамдан турган топтун курамына Пекиндеги өрт жана куткаруу бригадасынын, Кытайдагы жер титирөөдөн кийин ыкчам издөө жана куткаруу борборунун жана Башкы тез жардам ооруканасынын кызматкерлери кирет. Аларды төрт куткаруучу ит, 20 тонна куткаруучу техника жана материалдар, анын ичинде издөө жана аныктоо каражаттары, байланыш каражаттары жана биринчи медициналык жардам көрсөтүү үчүн медициналык буюмдар коштоп барды.

Топтун жетекчисинин айтымында, куткаруучулар тобу Түркия өкмөтүнүн жана Кытайдын Түркиядагы элчилигинин талаптарына, ошондой эле БУУнун көрсөтмөсүнө ылайык куткаруу иштерин жүргүзөт.

Бул КЭРдин Өзгөчө кырдаалдар министрлигинин карамагында түзүлгөн Кытайдын биринчи кесипкөй мамлекеттик деңгээлдеги комплекстүү өзгөчө кырдаалдарга чара көрүү тобу. Аталган топ түзүлгөндөн тарта Кытайда да, чет өлкөлөрдө да көптөгөн кырсыктарды жоюу операцияларына катышкан.

Эске салсак, 6-февралда Түркиянын түштүк облустарында жана коңшулаш Сирияда катуу жер титирөө болгон. Бул эки өлкөдө болгон табигый кырсык кеминде 9 миңдей адамдын өмүрүн алып, 45 миңден ашуун киши жаракат алды.

Булак: NazarNews.kg