Кыргыз авиациясынын маселелери чачтан көп

Журналист: НАРЫН АЙЫП

24.11.2021, 2:46

23718

коом

Жарандык авиация агенттигинин деректири Александр Настаев бүгүн билдиргенге караганда, президент Садыр Жапаров – Евробиримдиктин «кара тизмесинен» Кыргызстанды бир жыл ичинде чыгарыш керек деген тапшырма койду. Баарыбыздын эсибизде – Глазго шаарындагы саммитке президент 1-ноябрда өзүнүн «Ту-154» учагы менен эмес, Дубайдагы жеке менчик компаниядан ижарага алынган учак менен барган.

Кыргыз авикомпанияларынын бир дагы учагы 2006-жылдан бери – 15 жыл! – Европанын аба мейкиндигине кире албайт, анткени европалык талаптарга жооп бербейт. Авиакомпаниялардын саны дагы Кыргызстанда жыл сайын өзгөрүп турат, ошондуктан, мисалга, «S Group International» же «Valor Air» деген ишканалар пайда болот, бирок алар ким экенин кеңири коомчулук билбейт.

Чындыгында мындай компаниялар – Африка же башка жактан келип, Кыргызстанда катталып алгандар, бирок алардын учактары Европага жакындабайт, ошондуктан европадык эрежелер менен башы да оорубайт. Акча үчүн аларды Кыргызстанда каттагандарга дагы баары бир. Бул – кыргыз авиамаселелеринин бир кичинекей учу гана.