Бүгүн, 29-июлда Жогорку Кеңештин жыйынында депутат Бейшеналы Нурдинов («Кыргызстан») Баткен облусундагы кыргыз-тажик чек арасындагы абал боюнча маалымат берүүнү суранды.

Ал кечээ, 28-июлда чек арада ок атышуу болгонун айтты.

Депутатка УКМКнын Чек ара кызматынын өкүлү жооп берди. Анын айтымында, кечээ, 28-июлда Көк-Таш участогунун Кум-Мазар деген жеринде жөнөкөй жарандардын ортосунда ок атышуу болгон.

«Ал жакта Тажикстандын жарандары асманга ок чыгарышкан. Чек арачылардын ортосунда ок атышуу болгон эмес», - деди ал.

Депутат Нурдинов ок атышуудан чек арачы дагы каза болгонун белгиледи.

«Ал окуя 2 жума мурун болгон. Ал жашыруун маалымат болгондуктан эч нерсе айта албайбыз. Биз маалыматты жеке өзүңүзгө гана бере алабыз», - деди Чек ара кызматтын өкүлү.

Булак: NazarNews.kg