Екатеринбург шаарында Федералдык салык кызматынын жана ФСБ башкармалыгынын кызматкерлери Кыргызстандын жаранын жана орусиялык аялды чемодан толо акча менен кармашты. 

Анын ичинде болжол менен 79 миллион рубль бар болгон деп жазат "Знак" басылмасы өз булагына таянып.

27-июлда алар Бишкекке учуп кетүүнү пландашкан. Бирок бажыдан алардын багажынан дээрлик 79 миллион рубль табылган.

Басылманын маектешинин айтымында, ал киши Кыргызстандын Ички иштер министрлигинин пенсионери. Ал жана анын шериги ушунчалык көп акчаны кайдан алганын түшүндүрө алышкан жок. Андан кийин аларга карата протокол түзүлүп, Россия Федерациясынын Административдик укук бузуулар жөнүндө кодексинин 15.25-беренеси боюнча ("Россия Федерациясынын валюта мыйзамдарын бузуу") административдик иш козголгон. Акчаны өлкөнүн бюджетине өткөрүү пландалууда.

Булак: NazarNews.kg