Кытай эки миллиард адамды чапчып бараткан мамлекет. Алардан Орусияны мындай койолу, дүйнөнү титиретип турган АКШ жалтактап, үркүп турат. Азыркы тышкы иштер министри Руслан Казакбаевдин инисине турмушка чыгып вице-премьер министрди алган Алтынай Өмүрбекова кыргыз элинде турмуш ачылып-чачылып кеткенсип, жалпы элден жашырып Кытайга гумжардам бергенинин бети ачылып турат. Бир учурда кыргыздын белгилүү олигархы Аскар Салымбеков Кытайга 50 миң бет кап бере койгондо соцтармактын ичи ойкуп-толкуп кеткен. Мейли Салымбеков өз чөнтөгүнөн 50 миң бет кап берсин. Ал эми бийликтин вице-премьери Алтынай Өмүрбекова «өзүн өзү билип, өтүгүн төргө илип» өз чөнтөгүнөн эмес, мамлекеттик бюджеттен, элдин жакырланып турганына карабастан, гумжардамдарды олчойто жөнөтүшү, айлыкты көбөйтсө  дегенде эки көзү төрт элдин кабыргасын кашайтып турат. «Өлө албай жатып өлөң айтат» дегендей, өз элин бага албай жаткан Өмүрбекова 7 тоннага жакын дары-дармектен турган гумжардамды Кытайга берип  Бээжиндин көңүлүн алгысы келгенби, же башына күн түшсө кайынагасы Руслан Казакбаев экөө Кытайга кире качалы дегенби? Бул жүк Кытай мамлекетинин тапшырмасы менен аткарылганын эске алсак, эмне Кытай эмитен эле бизди башкара баштаганбы? Дагы койо турбайбы мүмкүн 2028-2029-жылга чейин Атамбаев алган карыздарды төлөп кутуларбыз. Садыр Жапаров октябрда өкмөт башына келгенде Кытайга болгон карыздарыбыздан кутулууга жол бар деп айтпады беле?

Вице-премьер Алтынай Өмүрбекова кыргызда болгон медикаменттерди 7 тонна кылып Кытайга жөнөтүп жиберип, кыргыз элине коронавирус каптап киргенде биздин мамлекет илдетке кабылгандарга дарылай турган дары жок, эки колун жайып отуруп берген. Эгер элди ойлогон вице-премьер болгондо кокустан коронавирус бизге кирип калса эмне кылабыз деп, медикаменттерди запаска сактап турмак. Дарынын барын Кытайга берип коюп, коронавирус кирген мезгилде жада калса керектүү дары-дармек жок, ал эми дары-дармек алып келген компаниялар өздөрү байыш үчүн, дары-дармектердин баасын асмандатып  көтөрүп жиберишип, караламан калк катуу түйшүк тартканын унута элекпиз. Мына биздин атка минерлердин бүгүнкү жүзү!

Коронавирустан  жалпы дүйнөдө каза болгондордун саны 2 миллион 140 480ден ашты.  Бейтаптардын саны 100 миллионго чукулдап, тагы  99 миллион 839 000, айыккандардын саны 71  миллион 841 000 болду.

Азизбек КЕЛДИБЕКОВ, NazarNews.kg