Украинадагы атайын операцияны жүргүзүү зарылдыгын РФ тышкы иштер министри Сергей Лавров Франция менен Бельгиянын, Улуу Британия менен Ирландиянын мисалында түшүндүрүп берди.

Лавров франциялык TF1 телеканалына интервью берген. Анын орусча тексти Орусиянын ТИМинин сайтына жарыяланды.

Министрдин айтымында, Москва Батышты көп жылдан бери Украинаны Орусияга каршы тукурбоого, Украинанын аймагы аркылуу РФке аскердик коркунуч жаратпоого, орус тилинин, билиминин жана маданиятынын өнүгүшүнө бут тоспоого чакырып келген.

"Биз көп жылдан бери чек арабыздагы кооптуулук боюнча эскертүү берип келгенбиз, бирок аны эч ким уккан жок. Мисалы, Бельгия француз тилинде сүйлөөгө тыюу салса Франция муну кандай кабыл алат эле? Же болбосо Ирландия англис тилине тыюу салса Англия кантет эле? Финляндия швед тилине каршы чыкканын бир мүнөткө элестетип көргүлөчү. Европа үчүн бул акылга сыйгыс нерсе. Ал эми орус тилине келгенде Европага баары бир", — деди Лавров.

Ал Орусия канча убакыттан бери Батышка үнүн жеткирүүгө аракет жасаганын жана атайын операция сөзсүз боло турчу нерсеге айланганын белгилеген. Кийинчерээк ал Франция менен Бельгиянын мисалын кайталаган.

"Бизге башка арга калтырбаган себептер болду. Украинада жашаган орус тилдүү адамдарды, орус тилин жана маданиятын неоулутчулдардан коргоого туура келди. Бельгия француз тилине тыюу салып койгонун элестетип көргүлө. Мындай учурда президент Макрон эмне кылат эле? Шайлоого барып шайлоочуларына буга көз жумуп коелу дейт беле? Күмөнүм бар", — деди ТИМ жетекчиси.

Лавровдун башка билдирүүлөрүн тезис менен беребиз.

Орусия Украинаны Батыштын колдоосу менен өнүгүп жаткан улутчулдуктан коргоп жатат. Батышка орус тилине, билимине мыйзам деңгээлинде тыюу салынып жатканы баары бир болчу.

АКШ Европаны өзүнө толугу менен баш ийдирип алды. Франциянын "стратегиялык автономия" концепциясын алдыга жылдыруу аракети көрүнүп турат, бирок бул позицияны Европанын бир дагы башка мамлекети колдогон жок.

Батыш колдогон Киев режими Орусияга кооптуулук жаратуу үчүн көп жылдан бери даярдалып келгенин көрсөттү.

Украинада улутчулдукту, неоулутчулдукту козутууда Франция демилгечинин биринин ролун ойноп жатат. Париж Киевди активдүү түрдө куралдандырууда. Согушту "жеңишке жеткиче жүргүзүүнү", "Орусияга сокку урууну" талап кылып атат.

Орусия атайын операция башталгандан эле президент Владимир Путин айткан нерсени талап кылып келет. Өлкө башчы Киев режимин Донбасстагы жай тургундарды өлтүрүүнү токтотууга чакырган. Ал бул нерсени сегиз жылдан бери кайталап келди.

Орусия көз карандысыз мамлекет катары тааныган Донецк жана Луганск облустарын бошотуу — башкы максат. Атайын операция жүргүзүлүп жаткан Украинанын башка аймактарынын тагдырын ошол жердин жашоочулары чечиши керек.

Европа биримдиги армиясын өз алдынча колдоно албайт. Буга НАТО жол бербейт.

Санкциялар мурда эле даярдалган жана жакынкы күндөрү алынбаса керек.

Путин Украинадагы абалды жөндөөгө чындап кызыккан тараптар менен сүйлөшүүгө даяр.

Булак: NazarNews.kg