Европанын тогуз өлкөсүндө маймыл чечегине чалдыккандар катталды. Бул тууралуу Дүйнөлүк саламаттык сактоо уюмуна (ДССУ) шилтеме берип РИА Новости жазды. Сегиз учур тууралуу мурда ДССУнун Европа боюнча аймактык директору Ханс Клюге билдирген.

"Бүгүнкү күндө ДССУнун Европа аймагындагы кеминде сегиз өлкөдө — Бельгия, Франция, Германия, Италия, Португалия, Испания, Швеция жана Улуу Британия маймыл чечек оорусу чыкканын билдиришкен. Эми Голландияда пайда болду. Мындай учурлар Австралияда, Канадада жана АКШда дагы катталган", — деди ал.

Маймыл чечеги – сейрек кездешкен вирустук инфекция, ал адамдарга да жугушу мүмкүн. Бул, адатта, жеңил оору болуп саналат жана жуктуруп алган адамдардын көбү бир нече жуманын ичинде айыгып кетишет. Бирок кээ бирлери кыйынчылыктарга дуушар болушу мүмкүн. Адистер маймыл чечегин жыныстык жол менен жугуучу инфекция деп эсептебейт. Анткен менен оорулуу адам менен жакын, байланышта болгондор жугузуп алышы мүмкүн.

Оорунун алгачкы белгилерине ысытма, баш оору, булчуңдардын оорушу, белдин оорушу, лимфа бездери шишип, чыйрыгуу жана чарчоо кирет. Көбүнчө беттен башталып, дененин башка бөлүктөрүнө исиркектер чыгат.

Кошумчалай кетсек, оорунун биринчи учуру Израилде аныкталган. ДССУдан ушул тапта оору жуктурган 37 учур боюнча маалымат бар экендигин айтышты. Дагы 71и изилденип жатат. Издөө иштери кеңейген сайын дагы көп нерселер күтүлүүдө.

Бул илдет тууралуу Кыргызстандын Коронавируска каршы башкы штабы дагы маалымат таратты. Анда маймыл чечегин адатта 16 жашка чейинки өспүрүмдөр көп жугузары жана оорудан 2-3 жуманын ичинде сакайып кетери айтылды.

 Булак: NazarNews.kg