Мамлекеттик кызматкерлерди пахта теримге жөнөтүү уланууда

Журналист: NAZARNEWS

27.11.2018, 21:40

26447

борбордук азия жаңылыктары

Түркмөнстанда мамлекеттик кызматкерлерди жапырт түрдө пахта теримге жөнөтүү уланып, план толтурбагандар 15 суткага камалууда. Бул тууралуу “Азаттыктын” түркмөн кызматы кабарлады.

Маалыматтарга караганда, өлкөнүн түштүгүндөгү Мары облусунда дарыгерлерди жана мугалимдерди азыркыга чейин пахта теримге жөнөтүшүүдө. Алар талаадагы пахтанын калдыктарын чогултушууда. План толтурбагандарды 15 күнгө чейин камап жатышканы айтылууда.

9-ноябрда Түркмөнстан өкмөтү 1 миллион 50 миң тонна пахта чогулуп, план толгонун кабарлаган.

Марыдан тышкары Дашогуз, Лебап облустарынын айрым аймактарында да мамлекеттик кызматкерлер ак була чогултушууда.

Түркмөнстанда пахта терим августтун аягында башталган. “Азаттыктын” түркмөн кызматы жана башка көз карандысыз медиа өкүлдөрү бул иштерге мамлекеттик кызматкерлер, ал гана эмес жоокерлер жана мектеп окуучулары тартылганын кабарлашкан.

Булак: "centralasian"