Урматтуу мекендештер!

Сиздерди Кыргызстандын Эгемендүүлүк күнү менен чын жүрөгүмдөн куттуктайм! Дүйнөдө азыркыга чейин саны көп, бирок мамлекети жок нечендеген улуттар жашап келет. Өз алдынча азаттыкка чыгып, көз карандысыз болуу үчүн алар жанын берүүгө даяр. Мына ошондуктан, бөлүнүп-жарылбай, Эгемендүүлүктүн баа-баркын сезели, ар бирибиз мамлекетибиздин алдындагы жоопкерчиликти жүрөк түпкүрүндө туя билгенде гана Кыргызстаныбыз күчтүү болот, алдыга карай ишенимдүү жылабыз!

Урматтуу эл-журт!
Жакында парламенттик шайлоо болгону турат. Ошого байланыштуу кыска сунушум бар. Эч нерсе башталбай жатып, дагы да элдин ичине бүлүк салып, сатып алуулар, алдамайлар башталганын байкап жатам. Ызы-чуу менен коркуткандар бар! Ачык эле паспортторду чогултуп, акча сунуш кылгандар болуп жатыптыр. Ушунун баарын мамлекетти талап-тоногон уурулар жасап жатат! Эгерде сиздер дагы алданып, алар сунуштаган акчаны алсаңыздар, мамлекетте эч кандай өзгөрүүлөр болбойт! Кайра эле уурулар келип, уурулугун уланта берет! Ошондуктан, мамлекетибиздин тагдырын, балдарыбыздын келечегин ойлогон болсоңуздар, мындай аракеттерге ачык эле “жок” дешиңиздер керек!

Пандемия биздин турмушубузду болуп көрбөгөндөй өзгөрттү. Өзгөчө, дарыгерлердин баатырдыгынын алдында тизе бүгүп, ыраазычылык билдирем. Онлайн окуудан мугалимдин баркын сездик. Эң негизгиси, улутту сактап кала тургун нерсе – саламаттыгыбыз экендигин билдик. Мен ар бир кыргызстандыктын үй-бүлөсүнө ден-соолукту, амандыкты, татыктуу жашоону каалайм. Бар болуңуздар, майрамыңыздар менен!

Терең урматым менен,
“Мекенчил” саясий партиясынын лидери Камчыбек Ташиев

Булак: NazarNews.kg