Беларусь Президенти Александр Лукашенко Минск менен Москва экономикасын өнүктүрүүдө өз күчүнө таянуусу керектигин, ал эми чет элдик өнөктөштөрдүн сунуштарына этияттык менен кароо зарылдыгын белгиледи.

"Бизде дагы көп мүмкүнчүлүктөр жана резервдер бар, азыркы кырдаалда аларды колдонушубуз керек. Бирок айта кетчү нерсе – дагы көп нерсе алдыда. Баары ойлогондой оңой жана тынч эмес. Дагы бир жолу баса белгилеп кетейин, бардыгы бизден көз каранды, биз өзүбүздүн мүмкүнчүлүктөрүбүзгө гана таянышыбыз керек", – деди Лукашенко шейшемби күнү Минскте Пензен облусунун губернатору Олег Мельниченко менен жолугушуу учурунда.

"Эгерде сырттан бир нерсе келсе, кубанычта болобуз, бирок бизге сунуш кылынган нерсени акыл калчап кабыл алышыбыз керек", – деп кошумчалады Лукашенко. Анын айтымында, буга Батыш мамлекеттери менен болгон мамилелердин тажрыйбасы далил. "Биз буга чейин эле жетиштүү тажрыйба топтодук: “Анда сапат жакшы, анда инвестициялар бар” деп чуркап жүрдүк. Азыр болсо акчаны уурдап, камап коюшту – Орусияныкы да, биздики да. Анда кайда калды ошол инвестициялар, биз ишенип келген сапат?" – деп белгиледи Лукашенко.

Ошондуктан, ал баса белгилегендей, Беларусь менен Орусия өз экономикалык мүмкүнчүлүктөрүнө таянуусу зарыл. "Биз көп нерсени жасай алабыз. Мен дайым айткандай, убакыт керек, чыдам керек. Кайда барабыз? Кээ бир учурларды өткөрүп жибердик, эми чыдоого туура келет, бирок өз күчүбүзгө таянышыбыз керек – бул биздин позициябыз. Орусияда муну бизден да жакшы түшүнүп жатышат деп ишенем. Келгиле, кызматташып, элдерибиз үчүн иштейли", – деп чакырды беларус лидери.