Россия президенти Владимир Путин “Биринчи канал” жамаатын 30 жылдык мааракеси менен куттуктап, телеканал өлкөнүн телеэфириндеги таанылган лидерлердин бири экенин белгиледи. Куттуктоо телеграммасы Кремлдин расмий сайтында жарыяланды.

"Урматтуу достор! Сиздерди “Биринчи каналдын” 30 жылдык мааракеси менен куттуктайм. Бул юбилей – сиздердин жамаат үчүн чоң жана маанилүү окуя, ошондой эле өлкөнүн жалпы тележурналистикасы үчүн да өзгөчө дата… Бүгүнкү күндө телеканалыңыздар өлкө телеэфириндеги таанылган лидерлердин бири болуп саналат. Кубандырарлык нерсе, сиздер заман менен тең жүрүүгө умтулуп, алдыңкы технологияларды кеңири колдонуп, журналистиканын этикалык принциптерине берилген бойдон калуудасыздар", – деп айтылат куттуктоо телеграммасында.

Президент баса белгилегендей, 1995-жылы негизделген “Биринчи канал” катарына таасирдүү, тажрыйбалуу адистерди жана чыгармачыл бийиктиктерди багынтууга даяр жаш таланттарды бириктирген.

"Ушул жылдар аралыгында мындай жаңычыл мамилеңиздер, түгөнгүс энергияңыздар жана чыгармачыл дараметиңиздер аркылуу көптөгөн кызыктуу идеяларды жана долбоорлорду ишке ашырдыңыздар. Биздин телеэфирди түрдүү маалыматтык, аналитикалык, билим берүүчү жана көңүл ачуу программалары менен байытып, көрөрмандарыңыздардын ишенимине ээ болдуңуздар", – деп кошумчалады мамлекет башчысы.

Ошондой эле Путин “Биринчи каналдын” аскердик кабарчыларынын кайратмандыгын жана духунун күчтүүлүгүн белгилеп, алардын атайын аскердик операция тууралуу репортаждарда көрсөткөн эмгегине токтолду.

"Алардын мекенчилдиги жана кесиптик, жарандык, адептик милдеттерине берилгендиги ар дайым жаш журналисттер үчүн үлгү болуп калат. Баарыңыздарга ийгиликтерди каалайм", – деп жыйынтыктады президент.