Россия менен Кытайдын өз ара аракеттенүүсү дүйнөдөгү туруксуздукка карабастан күчөп жатат, — деп билдирди Россиянын премьер-министри Михаил Мишустин.

«Глобалдык саясаттагы жана дүйнөлүк экономикадагы турбуленттүүлүккө карабастан, Россия менен Кытайдын кызматташтыгы бекемделүүдө. Биз жаңы ири долбоорлорду ишке киргизип жатабыз», — деди ал эки өлкөнүн өкмөт башчыларынын 30-жолку туруктуу жолугушуусунда сүйлөп жатып.

Мишустин белгилеген долбоорлордун катарына нефть жана газ кендерин иштетүү, жогорку технологиялык жабдууларды чыгаруу, энергетика жана тынч атом тармагы, авиация жана автоунаа куруу, ошондой эле космос изилдөө, транспорттук коридорлорду өнүктүрүү жана Арктиканын катаал шарттарында иштөө кирет.

Премьер-министр бул форматтагы жолугушуулар 30 жылдан бери үзгүлтүксүз өтүп келе жатканын белгилеп, анын өзгөчөлүгү — эки өлкө ортосундагы мамилелердин туруктуулугун, ишенимдүүлүгүн жана туруктуу өнүгүшүн көрсөтөөрүн айтты.

«Президент Владимир Владимирович Путин баса белгилегендей, Москва менен Пекиндин ортосунда кеңири жалпы кызыкчылыктар жана негизги маселелер боюнча окшош көз караштар бар», — деди Мишустин.

Ал ошондой эле кытайлык макалды келтирди: «Өз ара ишеним — достуктун бурч ташы». Анын айтымында, дал ошол ишеним жана жалпы кызыкчылыктарды түшүнүү Россия президенти жана Кытай төрагасы Си Цзиньпин койгон узак мөөнөттүү максаттарды натыйжалуу ишке ашырууга жардам берүүдө.

Михаил Мишустин Кытайда эки күндүк иш сапар менен жүрөт. Эки өлкөнүн өкмөт башчыларынын отузунчу туруктуу жолугушуусу Ханчжоу шаарында өттү.