Өлкөбүздө жоолук күнү белгиленүүдө

Журналист: NAZARNEWS

04.02.2018, 4:27

130674

коом

“Умма” ислам журналы эл аралык жоолук күнүнө байланыштуу Бишкекте иш-чара уюштурду. Анда аялдарга пайдалуу кеңештер, жоолукту тыкан жана жарашыктуу салынуу, кол өнөрчүлүк боюнча акысыз мастер-класстар, сынактар өткөрүлдү. Уюштуруучулардын айтымында, муну менен элге жоолуктун исламдагы, аялзатынын жашоосундагы орду тууралуу маалымат берүү максат кылынууда.

Андан сырткары, жоолук салынган кыздардын көйгөйлөрү, алар тууралуу коомдо калыптанып калган ой-пикирлерди жокко чыгарууга чакырык ташталды. Кыз-келиндерди үй-бүлө, карьера, ден соолук, сулуулук темаларында диалогго чакыруу да мерчемделген.

Дүйнөлүк жоолук күнү 2014-жылдан бери 1-февралда белгилене баштаган. Демилге АКШнын Нью-Йорк шаарынын тургуну Назма Ханга таандык. Ал эми Кыргызстанда төртүнчү жолу белгиленүүдө.

1-февралда Ош шаарында да ушундай иш-чара өткөрүлгөн.

Кылымдардан бери эле кыргыздардын айымдарынын башынан жоолук түшпөй келет. Бирок ошол кезде эле кыргыздар жоолукту турмушка чыккан келинге эле салышчу. Бул анын күйөөсү бар экендигинен кабар берет. Былтыр ушуга эле окшогон "Элечек күнү" белгиленген эле.

Эске салсак, жоолукту Орто Азия мамлекеттери, Кавказ жана Араб өлкөлөрүнүн айымдары салынат.

Булак: NazarNews.kg