Орусия Украинанын Буча шаарындагы окуялардан улам 4-апрелде БУУнун Коопсуздук кеңешинин жыйынын өткөрүүнү талап кылды. Бул тууралуу өлкөнүн БУУдагы туруктуу өкүлүнүн орун басары Дмитрий Полянский билдирди.

I am deeply shocked by the images of civilians killed in Bucha, Ukraine.

It is essential that an independent investigation leads to effective accountability.

— António Guterres (@antonioguterres) April 3, 2022

Өткөн жуманын аягында орус аскерлеринен бошотулган Буча шаарында көптөгөн жайкын тургундардын сөөктөрү табылган.

«Орус армиясы жайкын тургундарды өлтүргөн деген билдирүүлөр «украин радикалдарынын кыжырды келтирген чагымы». Биз чагымчылар менен алардын батыштагы колдоочуларынын жүзүн ачабыз», - деп жазды Полянский Телеграм каналына.

Өз кезегинде Украинанын президенти Владимир Зеленский Орусиянын Буча шаарындагы аракетин БУУнун Коопсуздук кеңешинде талкуулоону өтүндү.

Буга чейин БУУнун баш катчысы Антониу Гутерриш Бучадагы окуялар боюнча көз карандысыз иликтөө жүргүзүлүшү керек экенин айткан.

Өткөн жуманын соңунда орус аскерлери бир айдан ашык ээлеп турган Буча шаарында ондогон, балким жүздөгөн жай тургундар набыт болгону кабарланган. Украин аскерлери шаарга 1-апрелде киргенден кийин соцтармактарда Бучадагы көчөдө өлүп жаткан адамдардын сөөктөрү тартылган сүрөттөр менен видеолор пайда болгон. Мындан улам украин тарап Орусияны адамзатка каршы кылмыш кылууга айыптаган. Буга байланыштуу батыш өлкөлөрү Кремлге каршы жаңы санкцияларды киргизүүнү пландап жатышат.

Ишембиде Буча шаарына кирген Reuters менен AFP агенттигинин кабарчылары да көчөлөрдө жай тургундардын сөөктөрү көп экенин ырасташкан.

Өз кезегинде Орусиянын Коргоо министрлиги жайкын тургундар өлтүрүлгөнү тууралуу айыптоолорду четке кагып, бардык сүрөттөр менен видеолор чагым экенин жана аларды Киев режими «батыш ЖМКлары үчүн атайын жасаганын» билдирген.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg