Ооганстандын борбору Кабулдагы орус элчилигинин дарбазасынын алдында жардыруу болду. «Рейтер» полицияга таянып, аны жанкечти-террорист уюштурганын кабарлады.

«Талибандын» күзөтчүлөрү Орусия элчилигине жакындап келе жаткан жанкечти-террористке ок чыгарышкан. «Жанкечти Орусиянын Кабулдагы элчилигинин дарбазасын жардырып жиберген», — деп айтылат маалыматта.

РИА Новости булагы билдиргендей, жардыруу 5-сентябрда эртең менен Кабулдун Орусия элчилиги жайгашкан районунда болгон. Жардыруудан орусиялык дипломат жана элчиликтин кароолчусу жаракат алды.

Эскерте кетсек, 2-сентябрда Ооганстандын батышындагы Герат провинциясынын Гузара шаарындагы мечитте жума намаз учурунда жардыруу болгон. Окуядан 28 адам каза болгон.

Булак: NazarNews.kg