Ошто маршруттун айдоочулары жолду бөлүшө албай мушташкан. Анын натыйжасында, өтүп бара жаткан адамга бычак сайылган. Бул тууралуу журналисттерге Ош шаардык ички иштер башкармалыгы маалымдады.

Маалыматка ылайык, №125 маршруттук такси айдоочуларынын ортосунда мушташ 11-июль күнү болжол менен саат 11:00 чамасында болгон.

“Айдоочулардын бири атаандашына бычакты ыргытканда, өтүп бара жаткан жигиттин бутун жарадар кылган. Ага медициналык жардам көрсөтүлгөн”, – деп билдирди Ички иштер башкармалыгынан.

Милициядан кошумчалагандай, айдоочулардын өздүгү аныкталып, Кыргыз Республикасынын Кылмыш-жаза кодексинин “Бейбаштык” беренеси боюнча иш козголгон. Жабырлануучу аны бычактап салган белгисиз адамдарга карата арыз жазган. Тергөө иштери уланууда, чыр-чатактын катышуучуларынын бири дагы камакка алына элек.

Булак: NazarNews.kg