Ошто мугалимди атып өлтүргөн делип 63 жаштагы киши кармалды

Журналист: МЭЭРИМАЙ АЛЫБЕКОВА

26.03.2021, 17:16

23893

кылмыш жана кырсык

Ош шаарында мугалимди өлтүрүүгө шектүү киши кармалды. Бул тууралуу шаардык милициянын маалымат кызматы билдирди.

Белгилей кетсек, 23-март күнү Ош шаарынын Көкүм бий көчөсүнөн октон жаракат алган эркек кишинин сөөгү табылган. Маркум шаардагы №44 мектептин информатика мугалими экендиги, кечкисин таксист болуп иштеп жүргөнү белгилүү болгон. Каза болгон адамдын төш тарабына чачма ок тийгендиги айтылган.

Милиция шектүү катары Кара-Суунун 63 жаштагы тургунун бүгүн эртең менен кармаган.

«Ал кылган күнөөсүн толугу менен мойнуна алды. Кылмыш жасаган соӊ эски тааныштарынын үйүндө бекинип жаткан жеринен кармалды. Далил буюм катары ок атуучу курал алынды», — деп жазылган маалыматта.

Учурда шектүүнүн берген көрсөтмөсүн текшерүү иштери жүрүп жатат. Ош ШИИБдин тергөө кызматы тарабынан КРдин Жазык кодексинин 130-беренесинин 2-бөлүгүнүн 5-пунктунун белгилери менен («Пайда көрүү максатында киши өлтүрүү») сотко чейинки өндүрүш иши ачылып, иликтөө иштери уланууда.

Булак: NazaNews.kg