Өзбекстандын Тышкы миграция агенттиги Орусиядагы өзбек мигранттары бир жолку төлөмдөрдү алышат деген соцтармактардагы билдирүүнү четке какты.

Мекеменин билдирүүсүндө Өзбекстан президентинин жарлыгы менен Орусиядагы мигранттарга 9 539 рублдан (132 АКШ доллары) төлөнүп берилет деген маалымат калп экени айтылган.

Билдирүүдө мындай жалган маалыматтар коомчулукту адаштырып жатканы, бул төлөмдү алып берүүнү убада кылып, айрым жарандардан белгилүү бир сумма талап кылган учурлар кездешкени кошумчаланган.

Агенттиктин маалыматына караганда, оор турмуштук абалга кабылган эмгек мигранттары каржылай жардам үчүн www.birgamiz.com. платформасына гана кайрыла алышат. Мекеме жардам алуу үчүн эч кандай төлөм алынбай турганын белгиледи.

Булак: NazarNews.kg