Ташкентте 67 жашында Өзбекстандын Борбордук банкынын төрагасы Файзулла Муллажанов каза болду. Ал бул кызматты акыркы 14 жылдан бери аркалап келген жана америкалык Global Finance журналынын версиясы боюнча 2015-жылы эң мыкты улуттук банктардын башчыларырын тизмесине кирген.

Маалыматтарга караганда, Муллажанов акыркы эки-үч жылдан бери бөйрөгү ооруп, диабет менен жабыркап келген. Өткөн жылы бөйрөктөрү иштебей калгандыгына байланыштуу гемодиализ ала баштаган. Маркум бүгүн түштөн кийин жерге берилет.

Муллажанов узак убакыт президент Ислам Каримов, ал өлгөндөн кийин Шавкат Мирзиёев менен иштеген атка минерлердин бири болгон. Убагында оорусуна байланыштуу кыска мөөнөткө комага түшүп калганда дагы Каримов анын отставкасын кабыл алган эмес.

Муллажановдун эки уулу милиция жана прокуратурада жооптуу кызматтарда иштеген. Тун баласы коррупцияга айыпталгандан кийин алардын макамдары төмөндөтүлгөн. Учурда Борбордук банктын төрагасынын милдетин убактылуу анын орун басары Саидкамол Ходжаев аркалайт.