Учурда Украина менен сүйлөшүүлөрдүн келечеги жок. Бул тууралуу бүгүн, 12-сентябрда өткөн брифингде РФ президентинин басма сөз катчысы Дмитрий Песков журналисттерге билдирди.

«Биз учурда сүйлөшүүлөрдүн келечегин көрбөй жатабыз жана мындай сүйлөшүүлөргө эч кандай шарт жок деп айта беребиз», - дейт Песков.

Кремлдин басма сөз катчысынын айтымында, Украинадагы «атайын аскердик операция» башында коюлган бардык максаттар ишке ашмайынча уланат.

Песковдон Киевдин Орусиянын Украинанын маанилүү инфраструктурасына жасаган соккусу тууралуу билдирүүсүнө комментарий берүүсүн суранышты.

Ошондой эле, Киевден украин аскерлеринин каршы чабуулу тууралуу кабарларга байланыштуу Орусия Федерациясында мобилизация пландалып жатабы деген суроо да көтөрүлдү.

Бул эки тема боюнча, Песков мындай дейт:

«Бул эки маселе тең менин компетенциямда эмес, Коргоо министрлигинин компетенциясына кирет. Буталарга ракеталык сокку уруу фактылары, ошондой эле ракеталык соккулардын натыйжалары тууралуу бардык маалыматты РФ Коргоо министрлигиндеги менин кесиптешим берет. Кырдаалдын азыркы абалына бааны Коргоо министрлиги же Жогорку Башкы командачы берет».

Песков Путиндин Украинадагы «атайын аскердик операциясы» учурунда орус аскерлеринин кандайдыр бир аракеттеринен кабардар болгон коргоо министри жана башка аскер жетекчилери менен күнү-түнү байланышта экенин айтты.

«Албетте, атайын аскердик операция учурунда болуп жаткандардын баары, аскерлер тарабынан жасалган бардык аракеттер Жогорку командачыга билдирилет», - деди ал.

Ошол эле маалда Путиндин басма сөз катчысы Орусиянын Коопсуздук кеңешинин төрагасынын орун басары Дмитрий Медведевдин Москва Украина менен сүйлөшүүлөрдө Киевди толук багынып берүү маселесин гана талкуулоого даяр деген билдирүүсүнө комментарий берген жок.

«Чынын айтсам, комментарий бербейт элем. Албетте, мен Орусия атайын аскердик операциянын бардык максаттарын ишке ашырат дегенге кошулам», - деди Дмитрий Песков брифингде.

Булак: NazarNews.kg