Польша «Ислам мамлекети» террордук тобу менен байланышы бар деп шек саналган беш тажик жаранын өлкөдөн чыгарды. Аларга Шенген аймагына кирүүгө тыюу салынды.

Польшанын Ички коопсуздук агенттигинин маалыматына караганда, ал жихадга катышуу үчүн Сирияга барып, «Аль-Каидага» байланышы бар террордук уюмдун мүчөсү менен мамиле түзүүгө ниеттенген.

Белгилей кетсек, ушул жылдын май айында Польшанын бийлиги «Ислам мамлекети» террордук тобунун идеяларына шыктанып, адамдарды согушкерликке үндөгөнгө аракет кылган деген шек менен Тажикстандын төрт жараны кармалганын билдирген. Дагы бири кийинчерээк колго түшкөн.

Маалыматка ылайык, 4-августта Албанияда Германия террор үчүн айыптаган тажик жараны Интерполдун жардамы менен колго түшкөн. Жергиликтүү маалымат каражаттары ал 24 жаштагы Комром Зухуров аттуу адам экенин, «Ислам мамлекети» террордук уюмунун мүчөсү деп шек саналып жатканын жазып чыгышкан.

Ошондой эле Германияда 15-апрелде «Ислам мамлекети» террордук уюмунун мүчөлөрү деген шек менен Тажикстандын төрт жараны камакка алынган. Полиция алар Түндүк Рейн-Вестфалия аймагынын ар кайсы жерлеринен колго түшкөнүн, Германиядагы АКШнын аскердик жайларына кол салууну көздөп жүрүшкөнүн билдирген. Колго түшкөн 24-32 жаштагы жарандар Германияда качкын катары жашап жатышкан.

Прокурорлордун айтымында, алар алгач өз мекенинде кол салуу уюштурууну көздөшкөн, кийин оюн өзгөртүп, Германиядагы АКШнын аскердик жайларын жана ислам динин сындаган деген бир адамды бутага ала башташкан. Алар Сирия менен Ооганстандагы «Ислам мамлекети» террордук уюмунун жогорку даражалуу эки өкүлү менен такай байланышып жүрүшкөн.

Тажикстан Европада камакка алынып жаткан жарандарына байланыштуу комментарий берген эмес.

Булак: NazarNews.kg