— Бул парламенттин Алмазбек Атамбаевди кылмыш жоопкерчилигине тартуу үчүн кол тийбестигин алып салууга духу жетеби?

— Эгерде парламенттин өз эркине коё турган болсок, Атамбаевдин иммунитетин алганга кудурети жетет. Атамбаевге таарынгандары көп, анын командасынын ичинде болсо да буга чейин бугун чыгара албай, кыйналып жүргөндөр толтура. Азыркы саясий абал булардын баарына таасир берет.

— Добушту түшүнбөй калып берип коюптурбуз деген КСДП депутаттары чыгып жатпайбы?

— Алар Атамбаевдин арты менен парламентке келишкен, бир топ жылдар бою саясий элитанын катарына киришти. Өздөрү элестетпеген, түштөрүнө кирбеген саясий карьера жасашты, материалдык-финансылык пайдаларды көрүштү. Кээ бирлери уялгандан добуш беришкен жок. Айрымдары көпчүлүк менен добуш берип алып, партиясынын же болбосо Атамбаевдин тегерегиндеги адамдардын басымынан соң кайра баш тартып жатканына коркуп кеткени себеп болуп эсептелет. Мындан сырткары, азыркы бийликтин Атамбаевден иммунитетти алуу боюнча эрки, каалоосу боло турган болсо, бул дагы депутаттарга чоң басым болот. Мындай учурда депутаттардын 90–95 пайызы иммунитетти алууну колдооруна ишенем.

— Сооронбай Жээнбеков өзүн президенттикке алып чыккан адамдан иммунитетти алып салып, кылмыш жоопкерчилигине тартууга батына алабы?

— Парламент мыйзамды колдоп берсе, жалпы эле президенттердин кол тийбестиги алынат. Сооронбай Жээнбеков да кызматын тапшырып кеткенден кийин ушундай эле кыйынчылыктар туруп калышы мүмкүн. Ошондон улам азыркы президент бул мыйзамга жол бербей коюу мүмкүнчүлүгү жогору. Бирок, саясий абалга жараша кадам ташталат. Бир эле Бишкек ТЭЦтеги маселе эмес. Мындан кийин жол, Датка-Кемин, учактын кулашы, Батукаевдин маселеси көтөрүлүшү мүмкүн. Булар айланып келип Атамбаевге алып бара берет да, күндөн-күнгө курчуйт. Иммунитет тез чечилбей, жарым жылга созулуп кала турган болсо, аягына чыкпайт. Себеби, саясат, окуялар өзгөрөт. Президент Жээнбековдун акырындык менен күчү кетет. Саясатчылар, маалымат каражаттары, коомдук пикир колдогон учурду президент өткөрүп бара жатат.

— Атамбаев иммунитеттен ажырап, ишенимдүү кишилери Исаков менен Кулматов камала турган болсо Жээнбековдон кечирим суроого барышы мүмкүнбү?

— Президент Жээнбеков 2–3 маанилүү чечимдерди жасабай создуктура бере турган болсо, күздөн баштап анын колдоосу азыркыдай болбойт. Кадыр-баркы түшө баштайт. Ошол маалда Атамбаевдин реанимация болууга, саясатка кайта негизги күчтөрдүн бири болуп келүүгө мүмкүнчүлүгү жаралып, Жээнбеков менен башкача өңүттө сүйлөшө алат. Атамбаев айланасындагылардан кимди камабасын, ал Жээнбековдун алдына кечирим сурап барбайт. Иммунитетти алып таштай турган болсо, ал Кыргызстандан чыгып кетиши мүмкүн. Анын ресурсу, байлыгы жетиштүү.

Булак: "Жаңы Ордо"