Коронавируска экспресс-тест тапшыруунун жыйынтыгында Өкмөт үйүндөгү 9 адам коронавирус жуктурган болушу мүмкүн деп шектелүүдө. Бул тууралуу «АКИpress» агенттигине Президенттин администрациясындагы булактары билдирди.

Өлкөдө коронавирус жуктурган адамдардын саны көбөйүп жатканына байланыштуу бүгүн, 10-январдан тартып мамлекеттик органдардын борбордук аппараттарынын кызматкерлеринен коронавируска экспресс-тест алынып баштады.

Бүгүн эртең менен Президенттин администрациясынын, Президенттин иш башкармасынын, УКМКнын Мамлекеттик күзөт кызматынын 602 кызматкери текшерилген.

«Анын жыйынтыгында 9 кызматкердин анализинин жыйынтыгы шек жаратты. Алар ПЧР-тест тапшырууга жөнөтүлдү. Учурда ал кызматкерлер өз үйүндө жана ПЧР-тесттин жыйынтыгын күтүп жатышат. ПЧР-тесттин жыйынтыгы кечке маал белгилүү болот», - деп билдиришти булактар.

Ошондой эле кечээ, 9-январда Президенттин администрациясындагы бир нече жетекчи коронавирус жуктурганы белгилүү болду. Алар үйдө дарыланууда.

Булак: NazarNews.kg