Салык кызматынын 500 кызматкерин жумуштан бошотуу планын жокко чыгарууга чакырган петиция жарыяланды. Кайрылуу ээлери бул чечим кызматкерлерге да, мамлекеттик кызматтын сапатына да терс таасирин тийгизиши мүмкүн экенин билдирип, өлкө президенти Садыр Жапаровго кайрылышкан.

Кайрылууда жумуштан бошотуулар кеминде 1500 адамга таасир этери белгиленген, анткени көптөгөн кызматкерлер үй-бүлөлөрүндө негизги багуучулар болуп саналат.  Демилгечилер бийлик оптималдаштыруунун себеби катары Салык кызматын санариптештирүүнү атап жатканын, бирок, алардын пикиринде, бул процесс али аяктай электигин баса белгилешет.

Петициянын авторлору аймактын тургундары электрондук кызматтарды колдонууда кыйынчылыктарга, анын ичинде узун кезектерге жана салык кызматкерлеринен жардам суроо зарылдыгына туш болуп жатышканын билдиришет. Петицияда адистер көп учурда жарандарга система менен иштөөгө жардам берип, иш жүзүндө процедуралардын бир бөлүгүн алардын ордуна аткарып жатышканы айтылат.

Ошондой эле, ушул этапта санариптик технологияларды киргизүү жумуш көлөмүн азайтпастан, тескерисинче, көбөйткөнү белгиленет. Авторлордун айтымында, санариптик кызматтарга толук өтүү кызматкерлер үчүн да, коомчулук үчүн да кошумча окутууну талап кылат.

Петициянын авторлору президенттен кызматкерлерди кыскартуу маселесин кайра карап чыгууну жана санариптик система толук ишке ашырылып, натыйжалуу иштегенге чейин жумуш орундарын сактап калууну суранышкан. Акырында, петициянын авторлору жарандарды петицияны кол тамгалары менен колдоого чакырышты.