"Мен балам менен сыймыктанам", - деп бүгүн, 9-августта мурдагы премьер-министр Сапар Исаковдун апасы Нургүл Өмүрбаева журналисттерге билдирди.

"Менин балам суудан таза, кардан ак. Менин уюткулуу элим кайсы жерде акыйкаттык, кайсы жерде мыйзам бузуу болуп жатканын көрүп турат. Эртеби-кечпи эл өзүнүн калыс сөзүн айтат. Биз балабызды эч кимдин акысын жебе деп тарбиялаганбыз. Эгер ал мыйзамды бузса, жоопко тартса болот. Бирок күнөөсүз адамды каралаган - Кудайга жакпаган иш. Баары жакшы болот. Менин балам баштаган жакшы иштердин баары ишке ашат. Ал менен сыймыктанам", - деди Өмүрбаева.

Эске сала кетсек, бүгүн Бишкек шаардык соту мурунку премьер-министр Сапар Исаковдун баш коргоо чарасын узартуу маселесин карады. Сотто сөз сүйлөгөн Сапар Исаков өзүн ырааттуу жана сөзүндө турган адам катары сыпаттады.

“Мен үчүн ар-намыс баарынан жогору. Тергөөнүн талабы боюнча суракка белгиленген убакыттан 10-15 мүнөт эрте жана так келчүмүн. Тергөөчүнүн талабы боюнча бардык документтеримди – ID-картамды, жалпы жарандык жана дипломатиялык паспортторумду токтоосуз тапшырдым. Тергөөчү мага маанилүү иш-чарага катышуу үчүн Москвага барып-келүүмө уруксат берген, бирок, мен акыл калчап, тергөөдөн качып жатат деген шек болбошу үчүн барбоону чечтим. Бул көбүрөөк саясий процесс” – деп билдирди Сапар Исаков.

Бишкек ТЭЦин модернизацилоо жана кышындагы кыйроо боюнча төрт кылмыш иши козголуп, Айбек Калиев, Салайдин Авазов баштаган энерготармактагы жети топ-менеджер камакка алынган. Алардан тышкары, экс-премьер-министрлер Жантөрө Сатыбалдиев менен Сапар Исаков, Бишкек шаарынын экс-мэри Кубанычбек Кулматов да камакта отурушат. Булардын баарына жемкорлук боюнча айып тагылууда.

Булак: NazarNews.kg