Украинадагы «атайын аскердик операция» учурунда чабуулду басаңдатуу карапайым калктын жоготууларын азайтуу каалоосунан улам, аң-сезимдүү чечим болгон. Бул тууралуу Орусиянын коргоо министри Сергей Шойгу Шанхай кызматташтык уюмуна (ШКУ) мүчө мамлекеттердин коргоо министрлеринин Ташкентте өткөн жыйынында билдирди.

Анын айтымында, согуш маалында орус аскерлери гуманитардык укуктун нормаларын катуу сакташат.

«Соккулар Украинанын Куралдуу күчтөрүнүн аскердик инфраструктурасына – аэродромдорго, командалык пункттарга, бекемделген аймактарга, аскердик-өнөр жай комплексинин объектилерине жана кампаларга каршы жогорку тактыктагы куралдардын жардамы менен жасалууда.

Ошол эле учурда карапайым калктын курмандыктарын болтурбоо үчүн бардык аракеттер көрүлүүдө. Албетте, бул чабуулдун ылдамдыгын азайтат, бирок биз муну аң-сезимдүү кылып жатабыз», - дейт Шойгу.

Коргоо министрлигинин башчысы орус аскерлери оккупацияланган аймактарда бейпилдик жашоону орнотуу боюнча системалуу иштерди уюштурганын айтты.

«Биз гуманитардык жардам көрсөтүп, инфраструктураны жана жашоону камсыз кылуу системаларын калыбына келтирип жатабыз», - дейт ал.

Шойгу «Украинанын аскердик түзүмдөрү террористтер сыяктуу аракеттенип, күйүп кеткен жер тактикасын колдонуу менен эл аралык нормаларды одоно бузуп жатат» деп ырастады.

Булак: NazarNews.kg