Швеция НАТОго кирүү чечимин кабыл алды

Журналист: МЭЭРИМАЙ АЛЫБЕКОВА

16.05.2022, 8:42

22615

дүйнө жүзүндө

Швециянын Түндүк атлантикалык альянска кошулууга чечим кабыл алгандыгы башкаруучу Социал-демократиялык партиянын билдирүүсүндө айтылды. Бул туурасында РИА Новости жазды.

"15-майда болгон отурумунда, Социал-демократиялык партиянын башкармалыгы аталган саясий бирикме Швециянын НАТОго мүчө болушу үчүн арыз берүү жаатында иш алып барууну чечти", — деп айтылган расмий билдирүүдө.

Буга чейин Финляндия НАТОго кирүү чечимин кабыл алганын расмий жар салган.

Эскерте кетсек, Стокгольм менен Хельсинки көп жылдык нейтралдуулуктан баш тартып, НАТОго кирүү мүмкүнчүлүгү боюнча кеп кыла баштаган эле. Альянстын башкы катчысы Йенс Столтенберг бул мамлекеттер аскердик блокко кирүүнү кааласа НАТО аларды тез кабыл алууну камсыздай турганын билдирген. АКШнын НАТОдогу туруктуу өкүлү Жулиан Смиттин айтымында, уюм Швеция менен Финляндия жакынкы айларда же жумада альянска кирүү боюнча өз алдынча чечим чыгарат деп күтүүдө. Ал Кошмо Штаттар бул мамлекеттердин НАТОго кошулуу чечимин колдой турганын кошумчалаган.

Орусия эки өлкөнүн НАТОго кошулушун колдобойт. РФтин Коопсуздук кеңешинин төрагасынын орун басары Дмитрий Медведев эгер бул нерсе ишке аша турган болсо, чек араны бекемдөөгө туура келерин айткан. Себеби альянстын Орусия менен болгон кургактагы чек арасы эки эсе узаргандыктан Москва НАТОнун агрессивдүү аракеттерине даяр турушу керек болот.

Булак: NazarNews.kg